“Haaretz” qəzeti yazıb: "Araşdırmaya görə, Qəzzada yerləşdirilən İsrail əsgərlərinə heç bir təhlükə olmasa da, humanitar yardım gözləyən silahsız fələstinli mülki şəxslərə atəş açmaq əmri verilib".
İsrail qəzetinin yazdığına görə, əsgərlərlə müsahibələr göstərdi ki, komandirlər heç bir təhlükə yaratmasalar da, izdihamı dağıtmaq və ya uzaqlaşdırmaq üçün əsgərlərə onlara atəş açmağı əmr ediblər.
Bir əsgər "Haaretz" qəzetinə deyib ki, bura ölüm meydanıdır.
O, hər gün 1-5 adamın öldürüldüyünü və ölümcül olmayan üsullar əvəzinə izdihamı idarə etmək üçün canlı güllələrdən istifadə edildiyini söyləyib.
Bu bəyanatlar Qəzza Səhiyyə Nazirliyinin mayın 27-dən bəri yardım mərkəzləri və BMT-nin qida yük maşınlarında ən azı 549 fələstinlinin öldürüldüyü və 4000-dən çox fələstinlinin yaralandığı barədə hesabatlardan sonra verilib.
Qida paylama məntəqələrinə İsrail hakimiyyəti, Amerika yevangelist qrupları və özəl təhlükəsizlik şirkətləri tərəfindən koordinasiya edilən Qəzza Humanitar Fondu tərəfindən nəzarət edilir.
İsrailli ehtiyatda olan əsgərlərdən biri "Haaretz" qəzetinə açıqlamasında “Artıq Qəzza ilə heç həs maraqlanmır” deyib və bu ərazini “insan həyatının mənası olmayan qanunsuz bir ərazi” kimi təsvir edib.
"Niyə atəş açdıqlarını soruşduqda onlara dedilər ki, bu, yuxarıdan gələn göstərişdir... Əminliklə deyə bilərəm ki, insanlar qüvvələrə yaxın deyildilər və onlara təhlükə yaratmırdılar. Mənasızlıq idi, sadəcə olaraq, heç bir səbəb olmadan öldürüldülər", -deyə o əlavə edib.
Hesabatda bildirilib ki, hərbçilərin “çəkindiricilik proseduru” yardım məntəqələri açılmazdan əvvəl və ya bağlandıqdan xeyli sonra tanklardan minaatanlardan, pulemyotlardan və canlı güllələrdən atəş açmaqdan ibarətdir.
Bəzi hallarda "xəbərdarlıq atəşi" ölümcül hücumlara çevrildi.
Bir əsgər çimərlik yaxınlığındakı kütləyə atəş açmaq əmrinin verildiyini xatırladıb və deyib:
“Hər dəfə atəş açanda yaralılar və ölənlər olur. Və kimsə güllənin niyə atıldığını soruşduqda, heç vaxt yaxşı cavab yoxdur."
Əsgərlərin ifadələri bu ərazilərdəki əməliyyatlarına verdikləri qeyri-rəsmi adı da ortaya qoydu. "Haaretz" qəzetinin məlumatına görə, əməliyyat İsrail uşaqlarının “Qırmızı işıq, yaşıl işıq” oyununa istinad edən “Duzlu balıq əməliyyatı” adlanır.
Qəzet həmçinin bildirib ki, hərbçilər bu hadisələrlə bağlı mümkün hərbi cinayətləri araşdırmaq üçün Faktların Araşdırılması Qiymətləndirmə Mexanizmini təyin ediblər. Lakin qəzetə danışan zabitlər sahədə praktikanı dayandırmaq və ya araşdırmaq üçün çox az iş görüldüyünü bildiriblər.
Hüquq mənbələrindən biri qəzetə deyib: “Bu, bir neçə insanın öldürülməsindən getmir, biz hər gün onlarla itkidən danışırıq”.
Yoxlanılan bölmələrdən biri briqada generalı Yehuda Vachın komandanlıq etdiyi 252-ci diviziyadır və "Haaretz"in məlumatına görə, o, BMT-nin yardım maşınlarının yanında toplaşan mülki şəxslərə atəş açmaq üçün birbaşa əmr verib.
Onun tabeliyində olan əsgərlər bu siyasətin sualsız qəbul edildiyini bildiriblər. Zabitlərdən biri "Məqsəd, yalnız yemək üçün orada olsalar belə, onları tərk etməyə məcbur etməkdir" deyib.
Vəziyyət bu ərazilərdə tez-tez minimal nəzarətlə işləyən podratçılar tərəfindən daha da mürəkkəb hala gəlib. "Qəzzada mühəndislik avadanlığı ilə işləyən hər hansı bir özəl podratçı sökdükləri hər evə görə 5000 şekel (təxminən 1500 dollar) alır", -deyə zabit qeyd edib.
Beynəlxalq atəşkəs çağırışlarını rədd edən İsrail ordusu 2023-cü ilin oktyabr ayından Qəzzaya qarşı vəhşicəsinə hücuma keçərək, əksəriyyəti qadın və uşaq olmaqla təxminən 56.300 fələstinlini öldürüb.
Keçən ilin noyabrında Beynəlxalq Cinayət Məhkəməsi İsrailin Baş naziri Benyamin Netanyahu və keçmiş müdafiə naziri Yoav Qallantın Qəzzada hərbi cinayətlər və insanlığa qarşı cinayətlər törətdiyinə görə həbs olunmasına order verib.
İsrail həmçinin regionda apardığı müharibəyə görə Beynəlxalq Ədalət Məhkəməsində soyqırım işi ilə qarşı-qarşıyadır.
