Səudiyyə Ərəbistanının müdafiə naziri Xalid bin Salman bu həftə sonu İranın nüvə proqramı ilə bağlı İran və ABŞ arasında keçiriləcək danışıqlardan əvvəl Tehrana səfər edərək rəsmilərlə danışıqlar aparıb. Müdafiə naziri cümə axşamı günü Səudiyyə Ərəbistanı kralı Salman bin Əbdüləzizin mesajını İranın ali dini lideri Əli Xameneiyə təqdim edib. İran dövlət mediası mesajın məzmunu haqqında ətraflı məlumat verməyib.

Xalid bin Salman öz "X" səhifəsində paylaşım edərək deyib: "İkitərəfli münasibətlərimizi və ortaq maraqlarımızı müzakirə etdik." Əli Xamenei isə öz paylaşımında bu görüşü təsdiqləyib, amma məktubun məzmunu ilə bağlı hər hansı bir açıqlama verməyib.

Xalid bin Salman İranın prezidenti Məsud Pezeşkianla da görüşüb. Görüşdə Səudiyyə Ərəbistanı ilə İran arasındakı münasibətlərə nəzər salınıb və bu əlaqələrin necə inkişaf etdirilə biləcəyi müzakirə edilib. Görüşlə bağlı açıqlama verən Xalid bin Salman qeyd edib ki, regional və beynəlxalq inkişafları və bu istiqamətdəki səyləri müzakirə etdik.

Roma şəhərində İran-ABŞ danışıqları

İran və ABŞ bu həftə sonu Romada Tehranın mübahisəli uranın zənginləşdirilməsi proqramı ilə bağlı danışıqların ikinci raundunu keçirməyə hazırlaşır.

İranın ali dini lideri Əli Xamenei görüş zamanı deyib: “İran İslam Respublikası ilə Səudiyyə Ərəbistanı arasındakı əlaqələrin hər iki ölkə üçün faydalı olduğuna inanırıq.” Xamenei vurğulayıb ki, Tehran Ər-Riyadla əlaqələrin inkişafında qarşıya çıxan maneələri aşmağa hazırdır.

İran və Səudiyyə Ərəbistanı, Körfəzdə sabitlik və təhlükəsizliyi təhdid edən gərginliyi sona çatdırmaq məqsədilə, uzun illər davam edən düşmənçilikdən sonra Çinin vasitəçiliyi ilə 2023-cü ildə əlaqələri bərpa etmək barədə razılığa gəliblər.

Səudiyyə Ərəbistanı İranın ABŞ ilə nüvə danışıqlarını alqışlayıb və regional və beynəlxalq mübahisələrin həlli üçün səyləri dəstəkləyib.

İran dövlət mediasının verdiyi məlumata görə, İranın Baş Qərargah rəisi Məhəmməd Baqiri səudiyyəli nazirlə keçirdiyi görüşdən sonra deyib: “Pekin razılaşmasından sonra Səudiyyə Ərəbistanı və İran silahlı qüvvələri arasında münasibətlər yaxşılaşıb.”

Regional təhlükəsizliyin “ümumi strateji maraq” olduğunu vurğulayan Baqiri, Tehranın siyasətinin qonşuları ilə münasibətləri gücləndirməyə əsaslandığını bildirib.