Prezident Rəcəb Tayyib Ərdoğan NATO sammitində iştirak etmək üçün getdiyi Haaqada ABŞ prezidenti Donald Trampla görüşüb.
“TRT World” telekanalının verdiyi məlumata görə, görüşdə Türkiyə ilə ABŞ arasında münasibətlər, regional və qlobal məsələlər müzakirə edilib. Prezident Ərdoğan ABŞ prezidentinin səyləri nəticəsində əldə olunan İsrail və İran arasındakı atəşkəs razılaşmasını alqışlayıb və bunun daimi olmasını arzulayıb.
Dövlət başçısı Qəzzada baş verən humanitar faciənin yaxın zamanda dayandırılması və Rusiya - Ukrayna müharibəsinin sülh yolu ilə həlli üçün sıx dialoqun vacibliyini vurğulayıb.
Hər iki lider NATO-nun çəkindirici potensialının gücləndirilməsi üçün tədbirlərin görülməsinin vacibliyini ifadə ediblər. Prezident Ərdoğan hər iki ölkənin müxtəlif, xüsusən enerji və investisiya sahəsində böyük potensiala malik olduğunu və əməkdaşlığın inkişaf etdirilməsinin, xüsusilə də müdafiə sənayesində ümumi ticarətin 100 milyard dollarlıq hədəfə çatmasına töhfə verəcəyini bildirib.
Ərdoğanı kimlər müşayiət edir?
Qeyd edək ki, Ərdoğan iyunun 24-də NATO zirvəsində iştirak etmək üçün Niderlanda səfər edib. Türkiyə Prezidenti Amsterdamın Şiphol Hava Limanına enib və burada Niderland rəsmiləri, Türkiyənin NATO-dakı səfiri Basat Öztürk və Haaqadakı səfiri Səlçuk Ünal tərəfindən qarşılanıb.
Daha sonra zirvənin keçirildiyi Haaqa şəhərinə yola düşüb. Prezidentə Türkiyənin birinci xanımı Əminə Ərdoğan, xarici işlər naziri Hakan Fidan, milli müdafiə naziri Yaşar Gülər, Milli Kəşfiyyat Təşkilatının (MİT) rəhbəri İbrahim Kalın, Türkiyə Prezidenti Administrasiyasının İctimaiyyətlə Əlaqələr Departamentinin rəhbəri Fahrettin Altun və Ərdoğanın xarici siyasət və təhlükəsizlik üzrə baş müşaviri Akif Çağatay Kılıç müşayiət ediblər.
Türkiyənin yüksək səviyyəli rəsmilərindən biri İsrailin İran dövlət televiziyasına hücumunu pisləyib, eyni zamanda İsrail polisinin Hayfada "TRT Arabi" kanalının canlı yayımını dayandırması və TRT ilə "Alghad TV" komandalarına qarşı gücdən istifadə etməsini tənqid edib.
Dövlət başçısının zirvə çərçivəsində bir sıra dünya liderləri ilə ikitərəfli görüşlər keçirməsi gözlənilir. Zirvə Avro-Atlantik regionunu təhdid edən strateji risklər və təhlükələrə dair mövzuları diqqət mərkəzində saxlayacaq.
İki günlük NATO zirvəsi iyunun 25-də günü başa çatacaq.
