Rusiyanın Ukraynanın paytaxtı Kiyevə endirdiyi hücum nəticəsində azı 14 nəfər həyatını itirib, onlarla insan yaralanıb. Rəsmilər Odessa və Çerniqov vilayətlərində də insan tələfatının olduğunu bildiriblər.

Ukraynanın daxili işlər naziri İqor Klimenko deyib:“Rusiya Kiyevin bir sıra bölgələrinə zərbələr endirib. Hücum zamanı yaşayış binaları, təhsil müəssisələri və mühüm infrastruktur obyektləri hədəf alınıb.”

Kiyev meri Vitali Kliçko isə daha əvvəl paytaxtın Solomenski rayonunda ABŞ vətəndaşının Rusiyanın hücumu nəticəsində həlak olduğunu bildirib. Onun sözlərinə görə:
Kiyevə hücum zamanı 62 yaşlı ABŞ vətəndaşı həyatını itirib.

"Ultimatumlar"

Ukrayna prezidenti Volodimir Zelenskinin baş müşaviri Andrey Yermak rəsmi ‘‘Telegram’’ kanalında bildirib ki, Moskva Kiyevdəki yaşayış binalarına təşkil etdiyi yeni hücumlarla mülki əhaliyə qarşı müharibəni davam etdirir.

V.Zelenski bazar ertəsi G7 sammiti çərçivəsində ABŞ prezidenti Donald Trampla görüşməyə ümid etdiyini qeyd edib. Lakin İsrailin İrana hücumları səbəbilə Kanada səfərini vaxtından əvvəl başa vuran Tramp sammiti tərk edib.

Rusiya Müdafiə Nazirliyi qeyd edib ki, bir gecə ərzində Ukraynaya məxsus 147 pilotsuz uçuş aparatı (PUA) məhv edilib. Bildirilib ki, hava hücumundan müdafiə bölmələri bu PUA-ları Rusiya ərazisində, o cümlədən Moskva vilayətində vurub.

Moskva meri Sergey Sobyanin isə çərşənbə axşamı səhər saatlarında paytaxtı hədəf alan iki Ukrayna PUA-sının zərərsizləşdirildiyini açıqlayıb.