İspaniyanın Baş naziri Pedro Sançes İsrailin mühasirə altında olan ərazilərdə həyata keçirdiyi qətliamları “soyqırım” adlandırıb. O, bu fikri Avropa İttifaqına üzv ölkələrin Brüsseldə keçirilən sammitindən əvvəl səsləndirib.
Pedro Sançes İsrailin insan hüquqları ilə bağlı öhdəliklərini pozduğuna dair dəlillərə istinad edən hesabatı əsas gətirərək Avropa İttifaqını İsraillə əməkdaşlıq sazişini dərhal dayandırmağa çağırıb.
P.Sançes İsrailin törətdiyi soyqırımı açıq şəkildə tənqid edən Avropa liderlərindən biri hesab olunur.
İsrailin İspaniyadakı səfirliyi isə Sançesin bəyanatlarına sərt reaksiya verərək onu İsraili “şeytanlaşdırmaqda” və İspaniyanı “tarixin yanlış tərəfində yer almaqda” ittiham edib.
Buna cavab olaraq, İspaniya hökuməti İsrailin müvəqqəti işlər vəkilini Xarici İşlər Nazirliyinə çağırıb və səfirliyin reaksiyasını “qəbuledilməz” adlandırıb.
Xatırladaq ki, ötən ilin may ayında İspaniya İrlandiya və Norveçlə birlikdə Fələstini müstəqil dövlət kimi rəsmən tanıyıb. P.Sançes bu addımı “tarixi qərar” kimi qiymətləndirərək, bu qərarın beynəlxalq hüquqa uyğun olduğunu bildirib.
O, həmçinin bu qərarın hər hansı bir tərəfi hədəf almaq məqsədi daşımadığını, əksinə, bölgədə sülhün təşviqinə yönəldiyini vurğulayıb və İspaniyanın 1967-ci il sərhədlərinə əsaslanan iki dövlətli həll prinsipinə sadiq qaldığını bir daha bəyan edib.
Qəzzadakı Mülki Müdafiə Agentliyi yalnız cümə axşamı İsrail qüvvələrinin azı 76 nəfəri öldürdüyünü bildirib.
Agentliyin tibbi ləvazimatlar üzrə direktoru Məhəmməd əl-Muqhair bu ölümlərin yardım paylanma məntəqələri ətrafında İsrailin zorakılığı nəticəsində baş verdiyini qeyd edib.
Qəzzadakı səhiyyə rəsmilərinin məlumatına görə, ötən ilin oktyabr ayından bəri əksəriyyəti mülki vətəndaş olmaqla 56 mindən çox fələstinli həyatını itirib.
Birləşmiş Millətlər Təşkilatı (BMT) bu rəqəmləri etibarlı hesab edir.
Fələstinin rəsmi "WAFA" xəbər agentliyinin məlumatına əsasən, hazırda 11 minə yaxın fələstinlinin dağıdılmış evlərin qalıqları altında qaldığı ehtimal olunur. Ekspertlər isə real itki sayının Qəzza rəsmilərinin açıqladığı rəqəmləri üstələdiyini, hətta 200 minə çata biləcəyini bildirirlər.
İki milyondan çox əhalisi olan Qəzza zolağı İsrailin təxminən doqquz aydır davam edən hücumları və blokadası nəticəsində ciddi aclıq və humanitar böhranla üzləşib.
May ayının sonunda İsrail məhdud miqdarda humanitar yardımın bölgəyə daxil olmasına icazə versə də, BMT və insan hüquqları təşkilatlarının əməkdaşları bölgədə qida və dərman çatışmazlığının davam etdiyini vurğulayırlar. İsrail qüvvələrinin yardım almaq üçün toplaşan mülki şəxslərə qarşı zorakılıq tətbiq etməsi ilə bağlı xəbərlər də mütəmadi olaraq yayılır.
Qəzza Səhiyyə Nazirliyinin məlumatına görə, mayın sonundan bəri yardım məntəqələri yaxınlığında İsrailin həyata keçirdiyi hücumlar nəticəsində təxminən 550 nəfər həlak olub.
