Əməliyyat Bəşşar Əsəd rejiminin devrilməsindən sonra aparılan genişmiqyaslı terrorla mübarizə kampaniyasının bir hissəsi olaraq həyata keçirilib.

Suriya Daxili İşlər Nazirliyi həftə sonu ərzində Dәmәşqin qəsəbə və kəndlərində fəaliyyət göstərən bir neçə DEAŞ terror hüceyrəsinin təhlükəsizlik qüvvələri tərəfindən mәhv edildiyini açıqlayıb.

Bölgənin Daxili Təhlükəsizlik rəisi Hüssam əl-Tahan mayın 25-də etdiyi çıxışda, qruplaşmanın çökdürüldüyünü və dəqiq kəşfiyyat məlumatları sayəsində silahlar, partlayıcı maddələr və intihar jiletlərinin ələ keçirildiyini bildirib.

Əl-Tahan qeyd edib  ki, terror qruplaşması bu silah və partlayıcıları bölgəni sabitsizləşdirmək məqsədilə istifadə etməyi planlaşdırıb və keçmiş rejimin süqutuna baxmayaraq DEAŞ qalıqlarının yaratdığı təhlükə hələ də davam edir.

Əməliyyatlar davam edir

Qeyd edək ki, Suriya təhlükəsizlik qüvvələri həm keçmiş rejim tərəfdarlarına, həm də terror qruplaşmalarına qarşı əməliyyatlarını artırıb.

Yanvar ayında Suriya keçid hökumətinin yeni prezidenti seçilən Əhməd Şəraa hökumətin əsas prioritetlərindən birinin terrorla mübarizə olacağını bəyan etmişdi.

Rəsmi mənbələrə istinadən bildirilir ki, kəşfiyyat məlumatlarının toplanması sahəsində planlaşdırılan çoxsaylı hücumların qarşısı alınıb və uzun müddətdir zorakılıq baş verən ərazilərdə sabitliyin bərpasına töhfə verilib.