Türkiyə, İordaniya, İraq, Livan və Suriyanın birgə bəyanatında Suriyanın təhlükəsizliyini pozmağa yönəlmiş bütün cəhdlər qınanıb, həmçinin Suriya hökumətinə dəstək ifadə edilib.
Bazar günü İordaniyanın paytaxtı Əmmanda keçirilən regional təhlükəsizliklə iclasda Suriya və onun qonşuları Türkiyə, İordaniya, İraq və Livanın xarici işlər və müdafiə nazirləri, həmçinin kəşfiyyat rəhbərləri və hərbi liderlər bir araya gəliblər.
İclasdan sonra ölkələr birgə bəyanat yayımlayaraq, "Suriyanın təhlükəsizliyi, sabitliyi, suverenliyi və ərazi bütövlüyünü təmin edən əsaslar üzərində vətənlərini yenidən qurmaq üçün qardaş Suriya xalqına dəstək olduqlarını" təsdiqləyiblər.
Bəyanatda qeyd olunub ki, Suriyanın təhlükəsizliyi və sabitliyi "regionun təhlükəsizliyi və sabitliyi üçün vacibdir".
Region ölkələri Suriyanın təhlükəsizliyini, suverenliyini və sülhünü pozmağa çalışan bütün cəhdləri və qrupları qınayıblar.
“Onlar həmçinin Suriyanın sabitliyini və xalqının təhlükəsizliyini qorumaq üçün Suriya hökumətinin həyata keçirdiyi bütün tədbirləri dəstəklədiklərini ifadə ediblər”,-bəyanatda əlavə olunub.
İsrailin Suriyaya qarşı təcavüzü
Bəyanatda İsrailin Suriyaya qarşı təcavüzü də qınanıb və rədd edilib.
“İsrailin Suriyanın işlərinə müdaxilə cəhdləri beynəlxalq hüququn və beynəlxalq humanitar hüququn açıq şəkildə pozulması, Suriyanın suverenliyinə və ərazi bütövlüyünə hücum, həmçinin daha çox münaqişəyə səbəb olacaq bir eskalasiyadır”, -bəyanatda bildirilib.
İştirakçılar beynəlxalq ictimaiyyəti və BMT Təhlükəsizlik Şurasını beynəlxalq hüququ qorumağa, İsrailin pozuntularına son qoymağa və İsrailin işğal etdiyi bütün Suriya ərazilərindən geri çəkilməsini təmin etməyə çağırıblar.
Onlar həmçinin İsraili hücumlarını dayandırmağa və 1974-cü ildə Suriya ilə İsrail arasında imzalanmış atəşkəs sazişinə riayət etməyə çağırıblar, eyni zamanda Suriya Milli Dialoq Konfransının nəticələrini alqışlayıblar.
Terror qrupları
İştirakçılar DEAŞ terror qruplaşmasına qarşı mübarizə aparmaq üçün birgə əməliyyat mərkəzi yaratmaq barədə razılığa gəliblər.
Onlar həmçinin narkotik və silah qaçaqmalçılığı, mütəşəkkil cinayətkarlıqla mübarizə və Suriyanın imkanlarını gücləndirmək üçün dəstək göstərmək sahəsində əməkdaşlığı təsdiqləyiblər.
Ölkələr Suriyanın yenidənqurma səylərini dəstəkləyir, erkən bərpa layihələri üçün beynəlxalq dəstəyi səfərbər edir və Suriyanın bərpa imkanlarını artırmağa çalışırlar.
Onlar Suriyanın yenidən qurulmasına və xalqının ehtiyaclarını qarşılamağa kömək etmək üçün sanksiyaların qaldırılmasının vacibliyini vurğulayıblar.
Bəyanatda həmçinin iqtisadi, ticarət və investisiya əməkdaşlığının, eləcə də enerji və nəqliyyat daxil olmaqla infrastrukturun inkişafının gücləndirilməsinin əhəmiyyəti təsdiqlənib.
Ölkələr suriyalı qaçqınların "təhlükəsiz və davamlı" şəkildə geri qayıtması üçün zəruri təhlükəsizlik, yaşayış və siyasi şəraitin yaradılması məqsədilə regional ölkələr, beynəlxalq ictimaiyyət və müvafiq BMT təşkilatları ilə birgə işləməyi təsdiqləyiblər.
Onlar qaçqınların Suriyaya qayıtma prosesi başa çatana qədər beynəlxalq ictimaiyyətin ev sahibi ölkələrdəki qaçqınlara qarşı öz məsuliyyətlərini yerinə yetirməyə davam etməsinin vacibliyini vurğulayıblar.
Ölkələr bu günkü müzakirələrin üzərində işləmək və zəruri qərarlar qəbul etmək üçün qarşıdakı aylarda Türkiyədə ikinci görüşün keçiriləcəyini təsdiqləyiblər.
