Zelenski ABŞ-ın Krımla bağlı tənqidini rədd edir, Tramp Rusiya ilə razılığa gəldiyini açıqladı

Volodimir Zelenski ABŞ-ın 2018-ci ildə qəbul etdiyi və Rusiyanın yarımadanın ilhaqını rədd edən Krım Bəyannaməsinin fotosunu paylaşıb.

ABŞ prezidenti Donald Tramp Ağ Evdə jurnalistlərə deyib ki, o, həm Rusiya prezidenti Vladimir Putin, həm də Ukrayna prezidenti Volodimir Zelenski ilə Ukraynada müharibəyə son qoymaq üçün razılığa gəlib.

Lakin Tramp aprelin 23-də Zelenski ilə razılaşmanın hələ də çətin olduğuna işarə edərək, Ukrayna liderini Putindən daha çətin həmsöhbət adlandırıb.

Zelenski isə Ukraynanın Rusiyanın Krım yarımadasını işğalını tanımaqdan imtina etməsi ilə bağlı ABŞ-ın tənqidlərinə etiraz edib.

ABŞ Prezidenti Donald Tramp aprelin 23-də “Truth Social” platformasındakı paylaşımında deyib ki, Zelenskinin Krımın Rusiya ilə danışıqlardan kənarda saxlanılması ilə bağlı qırmızı xətti davam edən sülh danışıqlarına “çox ziyan vurur”.

Heç kim Zelenskidən Krımı Rusiya ərazisi kimi tanımasını tələb etmir, amma o, Krımı istəyirsə, niyə on bir il əvvəl Rusiyaya təhvil verilərkən bir güllə belə atılmadan onun uğrunda mübarizə aparmadılar?

Zelenski Kiyevdə keçirdiyi mətbuat konfransında deyib ki, bu məsələ ilə bağlı “danışacaq bir şey yoxdur”, çünki bu, ölkə konstitusiyasını pozur.

"Ukrayna həmişə öz Konstitusiyasına uyğun hərəkət edəcək və biz əminik ki, tərəfdaşlarımız, o cümlədən ABŞ güclü qərarlara uyğun hərəkət edəcək", -deyə Zelenski Trampın bəyanatına cavab olaraq "X" platformasında yazıb.

Zelenskinin paylaşımında ABŞ-ın o vaxtkı dövlət katibi Mayk Pompeonun 2018-ci ildə yaydığı Krım Bəyannaməsinin fotosu da yer alıb. Həmin bəyanatda ABŞ 2014-cü ildə Krımın Rusiya tərəfindən ilhaqına etiraz edib və “Ukraynanın ərazi bütövlüyü bərpa olunana qədər bu siyasəti davam etdirəcəyini” vəd edib.

London danışıqları

Zelenski həmçinin Fransa və Britaniyanın səyləri ilə aprelin 23-də Londonda keçirilən sülh danışıqlarını şərh edərək, Kiyevin belə birgə işin ölkəsində “davamlı sülhə” gətirib çıxaracağına ümid etdiyini deyib.

"Bu gün emosiyalar çox güclü idi. Amma nə yaxşı ki, beş ölkə, Ukrayna, ABŞ, Böyük Britaniya, Fransa və Almaniya sülhü mümkün etmək üçün bir araya gəldi", -deyə Zelenski bildirib.

"Tərəflər öz fikirlərini dilə gətirdi və bir-birinin hazırkı mövqelərinə hörmətlə yanaşdılar. Hər bir tərəfin sadəcə iştirakçı yox, mənalı töhfə verməsi vacib idi", - deyə Zelenski əlavə edib.

Ukraynanın Baş naziri Denis Şmıxal da aprelin 23-də bildirib ki, Kiyev ABŞ-la iqtisadi tərəfdaşlıq sazişinin bağlanmasını dəstəkləyir və Ukraynanın yenidən qurulması üçün investisiya fondunun yaradılması üzrə “texniki” danışıqları başa çatdırmaq üçün səy göstərir.

"Ukrayna hökuməti iqtisadi tərəfdaşlıq sazişinin bağlanmasını və yenidənqurma üçün investisiya fondunun yaradılmasını dəstəkləyir", -deyə Şmıxal Vaşinqtonda ABŞ-ın maliyyə naziri Skott Bessent ilə danışıqlardan sonra "X" platformasında etdiyi paylaşımda qeyd edib.