ABŞ prezidenti Donald Tramp immiqrasiya reydləri ilə bağlı etirazların nəzarətdən çıxması ilə əlaqədar Los-Ancelesdə güclü qanun və qayda tətbiq edəcəyinə söz verib.

  Yerləşdirilmiş qoşunlar müqavimətlə üzləşib və nümayişçilərə qarşı gözyaşardıcı qazdan istifadə edib.

  Kaliforniya qubernatoru Qevin Nyusomun (Gavin Newsom) etirazına baxmayaraq, Ağ Ev Milli Qvardiya qoşunlarını nümayiş yerinə göndərib.

  ABŞ prezidenti departament və agentliklərə Los-Ancelesi miqrantlardan təmizləmək üçün tapşırıq verib. O bildirib ki, bir vaxtlar böyük Amerika şəhəri olan Los-Ancelesi qanunsuz əcnəbilər və cinayətkarlar zəbt edib.

  “İndi zorakı, etirazçı dəstələr bizim deportasiya əməliyyatlarımızı dayandırmaq üçün federal agentlərimizə hücum edirlər. Mən daxili təhlükəsizlik katibi Kristi Noem, müdafiə katibi Pit Heqset və baş prokuror Pam Bondiyə bütün digər aidiyyəti departamentlər və agentliklərlə koordinasiyalı şəkildə Los-Ancelesi miqrant işğalından azad etmək üçün lazım olan bütün tədbirləri görməyə göstəriş verirəm” - deyə Tramp bildirib.

  ABŞ prezidenti Milli Qvardiyanın əsgərlərini göndərdikdən sonra Los-Ancelesdə miqrantların etiraz aksiyası kəskinləşib. Aksiyanı dağıtmaq üçün hüquq-mühafizə orqanlarının əməkdaşları gözyaşardıcı qaz və rezin güllələrdən istifadə ediblər.

  Yüzlərlə etirazçı Los-Anceles şəhərinin mərkəzindəki Metropolitan təcridxanasının qarşısına toplaşaraq saxlanılan miqrantların azad edilməsini tələb edir. 3 gündür davam edən aksiyalarda saxlananların sayı 100 nəfəri keçib.