Türkiyə prezidenti Rəcəb Tayyib Ərdoğan və Macarıstanın Baş naziri Viktor Orban telefonda ikitərəfli əlaqələr, regional və qlobal prosesləri müzakirə ediblər. Bu barədə Türkiyə Prezident Aparatı İctimaiyyətlə Əlaqələr departamenti məlumat yayıb.
Mayın 31-də baş tutan söhbət zamanı Ərdoğan Türkiyənin Macarıstanla bütün sahələrdə əlaqələri gücləndirmək əzmində olduğunu vurğulayıb. O, həmçinin Yüksək Səviyyəli Strateji Əməkdaşlıq Şurası və Birgə Məsləhətləşmə Mexanizminin qarşıdakı iclaslarının iki ölkə arasında əməkdaşlığı daha da dərinləşdirəcəyini qeyd edib.
Türkiyə lideri telefon danışığı zamanı Viktor Orbana doğum günü münasibətilə təbriklərini də çatdırıb.
Qeyd edək ki, Türkiyə və Macarıstan 2013-cü ildə Yüksək Səviyyəli Strateji Əməkdaşlıq Şurasının yaradılması ilə əlaqələrini strateji tərəfdaşlıq səviyyəsinə yüksəldib. Son illər də iki ölkə arasında siyasi, iqtisadi və mədəni sahələrdə əməkdaşlıq genişlənməkdədir.
