Hindistanın şimal-şərq ştatlarında daşqınlar və güclü yağışlar nəticəsində ölənlərin sayı 44 nəfərə çatıb. Son 24 saat ərzində ən azı 6 yeni ölüm faktı qeydə alınıb.

Şimal-şərqdəki Assam əyalətinin səlahiyyətliləri bildiriblər ki, son 24 saatda altı yeni ölüm də daxil olmaqla, daşqınlar nəticəsində indiyədək 12 nəfər ölüb.

Torpaq sürüşmələri nəticəsində daha 5 nəfərin öldüyü bildirilib. İndiyədək ştatda ölənlərin ümumi sayı 17-yə çatıb.

Ötən həftədən bəri Hindistanın şimal ştatlarında leysan yağışların səbəb olduğu daşqın və torpaq sürüşmələri nəticəsində minlərlə insan evlərini tərk edib.

Ən azı 1489 kənd və 617 136 nəfər daşqınlardan zərər çəkib.

Axtarış işləri davam edir

Arunaçal-Pradeş ştatının səlahiyyətliləri yağışla bağlı insidentlərdə 12 nəfərin öldüyünü bildirib.

Hindistan ordusu bildirib ki, Sikkim əyalətinin şimal hissəsində baş verən dağıdıcı torpaq sürüşməsindən sonra çətin hava şəraitinə və təhlükəli əraziyə baxmayaraq, axtarış-xilasetmə əməliyyatlarını qətiyyətlə davam etdirir.

"İtkin düşən 6 nəfərin axtarışları davam edir. Qeyri-sabit yer və yüksək hündürlükdəki çətinliklərə baxmayaraq, mütəxəssis qrupları və texnikası sahədə axtarış işlərini davam etdirir”, məlumatda bildirilib.

Ordu bu həftə Sikkimdə torpaq sürüşməsi nəticəsində iki əsgər və bir hambalın həlak olduğunu açıqlayıb.

Digər şimal-şərq ştatları da son bir neçə gündə itkilər olduğu barədə məlumat verib.

Baş nazir Narendra Modi iyunun 3-də daşqınlardan zərər çəkmiş ştatların rəsmiləri ilə görüşüb və bütün zərər çəkmiş ərazilərə “dəstək” sözü verib.