Ən böyük arzum həm Putini, həm də Zelenskini İstanbulda və ya Ankarada bir araya gətirməkdir. Hətta Trampı da yanlarına almaq istəyirəm.

Bu sözlər prezident Rəcəb Tayyib Ərdoğanın Nazirlər Kabinetinin keçirdiyi yığıncaqdan sonra verdiyi açıqlamada yer alıb.

"Bu gün İstanbulda Rusiya-Ukrayna nümayəndə heyətləri bir araya gəldi. Möhtəşəm bir görüş oldu. Bu dəfə əsir mübadiləsi min nəfəri keçdi. Əsir mübadiləsindən əlavə həm Rusiya, həm də Ukrayna tərəfi cəsədlərin geri qaytarılması ilə bağlı razılığa gəldi" - deyə dövlət başçısı qeyd edib.

Rusiya və Ukrayna nümayəndə heyətləri danışıqların ikinci raundu üçün İstanbulda görüşərkən danışan Ərdoğan hətta Trampı da gətirmək istədiyini bildirib.

Prezident Ərdoğan liderlər Türkiyədə bir araya gələcəyi təqdirdə onlarla bu görüşdə iştirak edəcəyini və beləliklə İstanbulun sülh mərkəzinə çevrilməsini istədiyini vurğulayıb.

Ərdoğan iyunun 1-də Ukraynanın 162 pilotsuz uçan aparatla həyata keçirdiyi genişmiqyaslı gecə hava hücumundan sonra iyunun 2-də keçirilən İstanbul danışıqlarını “əhəmiyyətli uğur” adlandırıb.

Həmin hücumda nüvə silahı daşıma həcminə sahib A-50, Tu-95 və Tu-22M3 ağır bombardman təyyarələri daxil 40-dan çox Rusiya hərbi təyyarəsi hədəfə alınıb.

Suriyada baş verən hadisələr

Ərdoğan Suriyadakı hadisələrə də toxunaraq, “Suriya sabitlik və sülh əldə etdikcə bütün qonşuları və bölgədəki bütün dövlətlərin bundan faydalanacağına inanırıq” deyib.

Ərdoğan Avropa ölkələrinin Suriyaya qarşı sanksiyaları ləğv etmək qərarına görə minnətdarlığını da bildirib.

Ərdoğan Suriyaya birbaşa uçuşların tezliklə başlayacağına da toxunaraq, uçuşların həm Suriyanın milli aviadaşıyıcısı, həm də Türkiyənin "AJet" aviaşirkəti tərəfindən həyata keçiriləcəyini bildirib.