ABŞ və Çin ticarət əlaqələrini inkişaf etdirmək üçün ümumi anlaşma əldə etdiklərini bildiriblər. Tərəflər prosesin liderlər tərəfindən təsdiqindən sonra konkret addımların atıla biləcəyini açıqlayıblar.

ABŞ və Çinin yüksəksəviyyəli rəsmiləri Londonda iki günlük danışıqlardan sonra ticarətə dair konsensus gətirməsi gözlənilən “çərçivə” üzərində razılaşdıqlarını elan ediblər.

ABŞ-ın ticarət naziri Hovard Lutnike iyunun 10-da bildirib ki, razılaşmanın həyata keçirilməsi ilə nadir torpaqlar və maqnitlərlə bağlı narahatlıqların “həll ediləcəyinə” optimistdir.

Lakin rəsmilər əlavə edib ki, çərçivə Londondakı tarixi Lancaster Houseda danışıqlardan sonra Vaşinqton və Pekin liderləri tərəfindən təsdiqlənməlidir.

Hər iki tərəf ixrac məhdudiyyətləri ilə bağlı çıxılmaz vəziyyətdən xilas olmağa çalışarkən danışıqların nəticələri səbirsizliklə gözlənilir. ABŞ rəsmiləri daha əvvəl Pekini nadir metalların tədarükünə icazə verilməsini ləngitməkdə ittiham etmişdilər.

Dünyanın iki ən böyük iqtisadiyyatı artan tarif müharibəsində müvəqqəti addımlar atdı, lakin onlar həm də daha uzunmüddətli “atəşkəs” yaratmağı hədəflədilər.

ABŞ-ın ticarət nümayəndəsi Camieson Greer jurnalistlərə "Biz bacardığımız qədər cəld hərəkət edirik və Çinlə qarşılıqlı əlaqələrimizə müsbət baxırıq" deyib.

Çin Xalq Respublikasının Beynəlxalq ticarət nümayəndəsi Li Çinqanq danışıqlar barədə deyib: “Bizim ünsiyyətimiz çox peşəkar, rasional, dərin və səmimi olub”.

Li ümidvar olduğunu bildirib ki, Londonda əldə olunan irəliləyiş iki tərəf arasında etimadın möhkəmlənməsinə kömək edəcək.

Cenevrə razılaşması

Görüş ABŞ prezidenti Donald Trampın keçən həftə Çin prezidenti Si Cinpinlə telefon danışığından sonra keçirilib. Tramp görüşdən sonra "Bu, hər iki ölkə üçün çox müsbət oldu" deyib.

Hər iki tərəf mayın 12-də Cenevrədə əldə olunmuş ticarət razılaşmasına əsaslanmağı hədəfləyir. Razılaşmaya əsasən buna, Trampın aprel ayında ABŞ-ın ticarət tərəfdaşlarına “qarşılıqlı” tariflər tətbiq edəcəyini elan etdiyi vaxtdan bəri əksər tariflərin 90 günlük dayandırılması və həyata keçirilən tədbirlərin geri qaytarılması daxildir.

Son həftələr hər iki tərəf bir-birini razılaşmanı pozmaqda ittiham edib.