“Böyük Yeddilik” (G7) ölkələrinin liderləri Kanadada bir araya gələrək İranın heç vaxt nüvə silahına sahib olmamalı olduğunu bəyan ediblər.

Kanada, Fransa, Almaniya, İtaliya, Yaponiya, Böyük Britaniya və Amerika Birləşmiş Ştatlarının rəhbərləri yaydıqları birgə bəyanatda bu ifadələrə yer veriblər:
“İran regional qeyri-sabitlik və terrorizmin əsas mənbəyidir. Biz dəfələrlə açıq şəkildə vurğulamışıq ki, İran heç vaxt nüvə silahına malik olmayacaq.”

Liderlər Yaxın Şərqdə sülh və sabitliyə sadiqliklərini bir daha ifadə edərək deyiblər:
“Bu kontekstdə biz İsrailin özünümüdafiə hüququnu tanıyır və onun təhlükəsizliyinə dəstəyimizi bir daha vurğulayırıq.”

Bəyanatda mülki şəxslərin müdafiəsinin vacibliyinə xüsusi diqqət çəkilib.

Liderlər həmçinin bildiriblər ki, İranla bağlı böhranın həlli Yaxın Şərqdə gərginliyin ümumilikdə azalmasına töhfə verəcək. Onlar beynəlxalq enerji bazarlarına təsir riskləri ilə bağlı sayıq olacaqlarını və bazardakı sabitliyin təmin olunması üçün sıx koordinasiyaya hazır olduqlarını bildiriblər.

Qeyd edək ki, ABŞ Prezidenti Donald Tramp bundan əvvəl İsrail–İran arasında artan gərginlik fonunda mülki vətəndaşları Tehranı dərhal tərk etməyə çağırmışdı.

Gərginlik cümə günü İsrailin İranın müxtəlif bölgələrinə o cümlədən hərbi və nüvə obyektlərinə koordinasiyalı hava hücumları və pilotsuz uçuş aparatlarla zərbələr endirməsi ilə daha da şiddətlənib. Rəsmi Tehran da hücumlara adekvat cavab verib.