Türkiyə prezidenti Rəcəb Tayyib Ərdoğan bildirib ki, Türkiyə F-35 proqramına yüz milyonlarla dollar yardım edib. Ancaq bu proqramdan çıxarılıb. İndi isə Ankara “haqsız yerə” kənarlaşdırıldığı F-35 reaktiv proqramına yenidən qoşulmaq niyyətindədir.
Ərdoğan NATO zirvəsindən qayıdarkən jurnalistlərə açıqlamasında “F-35-lərdən imtina etməmişik” deyib. Ərdoğan "Biz həmkarlarımızla layihəyə qayıtmaq niyyətimizi müzakirə edirik. Türkiyə haqsız yerə proqramdan kənarlaşdırılıb" deyib.
"Türkiyə çoxməqsədli bu təyyarənin hazırlanmasında ABŞ ilə əməkdaşlıq edən səkkiz ölkədən biri olub. F-35 proqramı texniki olduğu qədər də siyasi bir prosesdir. Türkiyənin bu proqramdan kənarlaşdırılması müttəfiqlik ruhuna uyğun gəlməyən bir addımdır və bu addımı hər zaman tənqid etmişik. Cənab Trampla danışıqlarımızda məsələni müzakirə etdik, texniki danışıqlar başladı. İrəliləyiş əldə edəcəyimizə ümid edirəm", -deyə dövlət başçısı vurğulayıb.
Qeyd edək ki, Türkiyə Rusiyadan S-400 hava hücumundan müdafiə sistemi aldıqdan sonra proqramdan çıxarılıb.
Bununla belə, Ərdoğan Trampla danışıqlarda S-400-ün gündəmə gəlmədiyini bildirərək deyib: "Bu məsələ artıq gündəmdə deyil. Hava hücumundan müdafiə sistemi S-400 ilə bitmir. Biz "Polad günbəz"imizi qururuq. Ankara SİPER, HİSAR, SUNGUR və milli döyüş təyyarəsi KAAN kimi yerli raketdən müdafiə layihələrini ehtiva edən müxtəlif yüksəkliyə malik HHM sistemlərini, sensorları, radioelektron mübarizə sistemlərini birləşdirir".
NATO Zirvə sammitinin nəticələrinə də toxunan Ərdoğan NATO-nun qarşıdakı on ildə müdafiə xərclərini ÜDM-in 5 faizinə çatdırmaq öhdəliyini vurğulayaraq, Türkiyənin bu hədəfə çatmağa ən yaxın ölkələrdən biri olduğunu bildirib. O, həmçinin müttəfiqlər arasında xüsusilə müdafiə sənayesi əməkdaşlığı sahəsində məhdudiyyətlərin aradan qaldırılmasının vacibliyinə diqqət çəkib.
Ərdoğan həmçinin 2026-cı ildə NATO Liderlər sammitinin Türkiyədə keçiriləcəyini təsdiqləyib.
Türkiyənin Ukrayna-Rusiya sülh danışıqlarında vasitəçi roluna sadiq qaldığını bildirən Ərdoğan İstanbul Prosesinin yenidən başlaması öhdəliyini təkrarlayıb və üçüncü sülh danışıqlarına ev sahibliyi etməyi təklif edib. Kiyev və Moskvanın Türkiyənin vasitəçiliyinə inanmağa davam etdiyini ifadə edən dövlət başçısı “Hər kəs sülhdən əl çəksə belə, biz bundan vaz keçməyəcəyik” deyib.
Ərdoğan sammit zamanı ikitərəfli görüş keçirdiyi Trampın belə bir sammitə dəstək verdiyini də bildirib və deyib ki, Putin həll üçün İstanbula və ya Ankaraya gələrsə Tramp da gələcəyini söylədi.
