ABŞ prezidenti Donald Tramp Rusiya prezidenti Vladimir Putini sərt tənqid edərək onun Ukraynaya qarşı həftəsonu etdiyi bombardmanlara görə "lap dəli olduğunu" deyib.

  “Truth Social” platformasında Tramp yazıb: "O, tamamilə dəli olub. Lazımsız yerə çoxlu insanları öldürür, hələ mən yalnız əsgərləri demirəm.

  Putin Ukraynanın bir hissəsini deyil, hamısını istəyir. Amma əgər belə edərsə, bu, Rusiyanın süqutuna səbəb olar.

  Münaqişədən uzaq durmağa çalışıram. Çünki bu, Zelenskinin, Putinin və Baydenin müharibəsidir, Trampın deyil. Mən böyük və əcayib yanğınları söndürmək istəyirəm, hansı ki, bunlar bacarıqsızlıq və nifrət nəticəsində başlanıb”.

  Mayın 25-ində D.Tramp Nyu-Cersi ştatının Morriston şəhərindəki hava limanında Vaşinqtona qayıdarkən jurnalistlərə deyib: “Mən bilmirəm, Putinə nə olub? Niyə belə edir? Çoxlu insanları öldürür. Heç bundan məmnun deyiləm."

  Tramp bu açıqlamaları Rusiya tərəfindən 25 may gecəsi Ukrayna şəhərlərinə, o cümlədən paytaxt Kiyevə qarşı həyata keçirilən 367 pilotsuz uçuş aparatı və raket hücumlarına cavab olaraq verib. Bu, müharibənin indiyə qədərki ən böyük hava hücumu olub və nəticədə təxminən 12 nəfər həlak olub, onlarla adam yaralanıb.

  Üç ildir davam edən Ukrayna müharibəsində hər iki tərəfi atəşkəsə razı salmağa çalışan ABŞ prezidenti ötən həftə Putinlə iki saatdan telefonda danışıb.

  Avropa dövlət başçıları ilə də danışan Tramp bildirib: “Putin Ukraynada müharibəni bitirməyə hazır deyil, çünki qalib gəldiyini düşünür”, “The Wall Street Journal”ın yazdığına görə.

  Donald Tramp son zorakılıqlara cavab olaraq ABŞ-ın Rusiyaya sanksiyalarını artırmağı nəzərdən keçirdiklərini söyləyib. Amma bu bəyanat ABŞ Dövlət katibi Marko Rubionun bu həftə konqresdəki çıxışı ilə ziddiyyət təşkil edir. Rubio demişdi: “ABŞ hazırda sanksiyalarla hədələməyə başlasa, ruslar danışmağı dayandıracaq".

  Rusiya prezidenti Vladimir Putin Ukraynaya üç illik işğalını dayandırmaq üçün heç bir öhdəlik götürməyib, sadəcə rəsmi Moskvadan sülh tələblərini əks etdirən memorandum üzərində işləmək üçün qeyri-müəyyən bir təklif irəli sürüb.