İsrail polisi Hayfa şəhərində TRT Arabi də daxil olmaqla xarici televiziya orqanlarının fəaliyyət göstərdiyi obyektlərə basqın edərək onların avadanlıqlarını ələ keçirib.

Bu addım İsrailin ifrat sağçı Milli Təhlükəsizlik naziri İtamar Ben-Qvirin polis və kəşfiyyat qurumlarına xarici televiziya yayımlarının qarşısını almaq barədə göstəriş verməsindən sonra atılıb.

Polisin açıqlamasında əməliyyatın Ben-Qvirin “sıfır tolerantlıq” siyasətinə uyğun həyata keçirildiyi bildirilib. Məlumata görə, Hayfadakı bir otel otağına basqın zamanı kameraların şəhər limanını çəkdiyi aşkar olunub.

Avadanlıqları ələ keçirilən jurnalistlərin dindirilmək üçün çağırıldığı qeyd olunub. İtamar Ben-Qvir İsrailin daxili kəşfiyyat agentliyi Şin Beti xarici kanallara qarşı tədbir görməyə çağırıb.

İyunun 15-də səhər saatlarında İranın raket hücumu nəticəsində Hayfadakı neft emalı zavoduna zərbə dəyib. Hadisə Əl-Cəzirə telekanalı tərəfindən canlı yayımlanıb və İsrail mediasında tənqidə səbəb olub. Zərər səbəbindən zavodda əməliyyatlar müvəqqəti dayandırılıb.