Grupi palestinez Hamas ka kërkuar nga komuniteti ndërkombëtar ta “ngrejë zërin dhe të dalë në rrugë” në solidaritet me Gazën dhe të denoncojë “politikën e urisë të Izraelit dhe gjenocidin”. 

“Le të jenë e diela dhe ditët në vijim ditë globale zemërimi dhe dënimi të krimeve të kryera kundër civilëve të pafajshëm në Gaza”, tha Hamasi.

Grupi i rezistencës palestineze kërkoi përpjekje të përbashkëta arabe, islame dhe ndërkombëtare për të ndaluar “katastrofën humanitare me të cilën përballen mbi 2 milionë palestinezë” në enklavën e bllokuar.

Më herët, Ministria e Shëndetësisë në Gaza paralajmëroi për përkeqësim të urisë, duke përmendur rritjen e vdekjeve për shkak të urisë dhe shembjes së infrastrukturës mjekësore.

Që nga tetori i vitit 2023, ushtria izraelite ka vrarë të paktën 59 mijë palestinezë në Rripin e Gazës, shumica prej tyre gra dhe fëmijë. Bombardimet e pandërprera e kanë shkatërruar enklavën, duke e bërë atë të pabanueshme.

Agjencia e OKB-së për refugjatët palestinezë tha se njerëzit në Gaza po jetojnë nën “bombardime, zhvendosje dhe rrethim”. Ata po përballen me vapën e pandërprerë të verës me pak ose aspak strehim, ujë të pastër ose energji elektrike.

Më 2 mars, Izraeli vendosi një bllokadë të plotë humanitare në Gaza, duke ndërprerë ushqimin, furnizimet mjekësore dhe ndihma të tjera për më shumë se 2 milionë palestinezë në territor.

Që nga fundi i muajit maj, agjencitë e OKB-së janë anashkaluar dhe Fondacioni Humanitar i Gazës, i cili është kontrovers, po operon qendrat e shpërndarjes së ndihmave, duke çuar në qindra vdekje që atëherë.