Gjermania kritikoi të mërkurën sulmet ajrore të Izraelit në jug të Sirisë, duke i bërë thirrje Tel Avivit që të përmbahet nga veprimet që mund të çojnë në destabilizimin e vendit.

Zëdhënësi i Ministrisë së Jashtme, Christian Wagner, tha në një konferencë për shtyp në Berlin se Gjermania po e ndjek me vëmendje situatën në Siri, përfshirë trazirat e fundit në provincën Suwayda dhe sulmet ajrore izraelite që kanë në shënjestër forcat siriane.

“Ne u bëjmë thirrje të gjitha palëve që të përmbahen nga ndërmarrja e hapave që mund të destabilizojnë Sirinë,” u tha Wagner gazetarëve kur u pyet për sulmet ajrore. “Është e qartë se Siria nuk duhet të kthehet në një lodër të fuqive të huaja, dhe se sovraniteti i saj duhet të ruhet,” theksoi ai.

Wagner shtoi se Izraeli “duhet të ketë interes për një Siri të qëndrueshme” dhe për një qeveri siriane efektive që garanton sigurinë për të gjitha grupet e popullsisë në vend.

“Prioriteti kryesor duhet të jetë që qeveria në Damask të jetë funksionale dhe të mundë ta sigurojë rendin në të gjitha pjesët e Sirisë,” tha ai. “Dhe për ta arritur këtë, duhet, sigurisht, të përfshihen të gjitha grupet e popullsisë në këtë proces. Sovraniteti dhe integriteti territorial i Sirisë duhet të ruhen,” përfundoi ai.