Центарот за борба против дезинформации на Дирекцијата за комуникации при турското Претседателство денес го отфрли тврдењето дека „на Туркије ќе ѝ бидат обезбедени девизи што ѝ се потребни во замена за евакуација на 750.000 жители на Газа“ поради израелско-палестинскиот конфликт што беснее од 7. октомври.

„Тврдењето дека ‘САД и Израел преговараат со земјите од Персискиот Залив, Египет и Туркије, за евакуација на населението од Газа во замена за прекин на конфликтот и дека на Туркије ќе ѝ бидат обезбедени девизи што ѝ се потребни во замена за евакуација на 750.000 жители на Газа, не е точно“, се нагласува во објавата на Центарот на официјалниот профил на платформата X.

„Под раководство на претседателот на Република Туркије, Реџеп Таип Ердоган, Туркије продолжува со максималните напори за итно запирање на силното бомбардирање на Појасот Газа, за заштита на животите на цивилите, за обезбедување непречена испорака на хуманитарна помош во Газа и спречување на раселувањето на цивилите во Појасот Газа“, се додава.

„Ние цврсто го отфрламе секој пристап што има цел раселување на цивилите во Газа. На неоснованите тврдења не треба да им се придава значење“, заклучи Центарот во објавата што на крајот го имаше тагот „#FakeNews“.