იემენის ჰუსიტების დაჯგუფებამ კვირას განაცხადა, რომ მიიღო სამხედრო ოპერაციების „გაძლიერების“ გადაწყვეტილება და ღაზაში მიმდინარე გენოციდის საპასუხოდ ისრაელის წინააღმდეგ „საზღვაო ბლოკადის“ მეოთხე ეტაპის განხორციელება დაიწყო.
დაჯგუფების შეიარაღებული ძალების მიერ გავრცელებულ განცხადებაში ჰუსიტებმა განმარტეს, რომ ეს ეტაპი „მოიცავს ისრაელის პორტებთან მომუშავე ნებისმიერი კომპანიის კუთვნილი ყველა გემის სამიზნედ ქცევას, მიუხედავად კომპანიის ეროვნებისა და იმისა, თუ სად იმყოფება გემი, რომელზეც შეიარაღებულ ძალებს ხელი მიუწვდებათ“.
დაჯგუფებამ ასევე გააფრთხილა, რომ გემები „შესაძლოა სამიზნე გახდნენ ნებისმიერ ადგილას, სადაც რაკეტებს ან უპილოტო საფრენ აპარატებს მიღწევა შეუძლიათ, მათი დანიშნულების ადგილის მიუხედავად“.
დაჯგუფებამ ხაზგასმით აღნიშნა, რომ „ყველა ქვეყანამ, ვისაც ამ დაძაბულობის თავიდან აცილება სურს, უნდა აიძულოს მტერი, შეწყვიტოს თავდასხმები და მოხსნას ღაზის ბლოკადა“ და დასძინა: „ამ სამყაროში მცხოვრები თავისუფალი ადამიანი ვერ შეეგუება იმას, რაც ხდება“.
ჰუსიტებმა ისრაელის მიმართ სარაკეტო და უპილოტო საფრენი აპარატებით თავდასხმები მას შემდეგ გააძლიერეს, რაც ისრაელის ძალებმა მარტში ღაზაზე თავდასხმები განაახლეს. თავდასხმები ორთვიანი მყიფე ცეცხლის შეწყვეტის შემდეგ განახლდა.
2023 წლის ნოემბრიდან დაჯგუფება, ღაზაში პალესტინელების მხარდასაჭერად, წითელ ზღვაში, ადენის ყურესა და არაბეთის ზღვაში კომერციულ გემებსაც ესხმის თავს. ისრაელის თავდასხმების შედეგად ღაზაში 59,800-ზე მეტი ადამიანი დაიღუპა.