აშშ-ის პრეზიდენტმა ტრამპმა გააკრიტიკა ინდოეთის პოზიცია და გააფრთხილა ეკონომიკური სანქციების გაზრდის შესახებ.
აშშ-ის პრეზიდენტმა დონალდ ტრამპმა განაცხადა, რომ რუსეთიდან ნავთობის შესყიდვის გამო ინდოეთისთვის საბაჟო გადასახადებს მნიშვნელოვნად გაზრდის.
ტრამპმა ორშაბათს „Truth Social“-ზე გამოქვეყნებულ პოსტში თქვა: „ინდოეთი არა მხოლოდ დიდი რაოდენობით რუსულ ნავთობს ყიდულობს, არამედ ნაყიდი ნავთობის დიდ ნაწილს ღია ბაზარზე მაღალი მოგებით ყიდის. მათ არ ადარდებთ, რამდენ ადამიანს კლავს რუსული სამხედრო მანქანა უკრაინაში“.
„ამიტომ, მე მნიშვნელოვნად გავზრდი საბაჟო გადასახადს, რომელსაც ინდოეთი უხდის აშშ-ს“, - დასძინა მან, თუმცა არ დაუკონკრეტებია, რამდენად გაიზრდებოდა გადასახადი.
ეს განცხადება მოჰყვა ტრამპის წინა სანქციების მუქარას ნიუ დელის მიმართ, მოსკოვთან ენერგეტიკისა და თავდაცვის სფეროში მიმდინარე ურთიერთობების გამო.
ვაჭრობა რუსეთთან
გასულ წელს, რუსულმა ნავთობმა ინდოეთის ნავთობის მთლიანი იმპორტის 35%-დან 40%-მდე შეადგინა.
ინდოეთს ტრამპის ბოლო განცხადებებზე ოფიციალური პასუხი არ გაუკეთებია.
გასულ კვირას ტრამპმა განაცხადა, რომ ინდოეთიდან იმპორტირებულ პროდუქტებზე 25%-იან საბაჟო გადასახადს დააწესებდა და რომ მსოფლიოს მეხუთე უდიდესი ეკონომიკა დამატებითი ჯარიმის წინაშეც აღმოჩნდებოდა, თუმცა დეტალები არ დაუკონკრეტებია.
შაბათ-კვირას, „Reuters“-თან საუბარში ინდოეთის მთავრობის ორმა წყარომ განაცხადა, რომ აშშ-ის პრეზიდენტ ტრამპის მუქარის მიუხედავად, ინდოეთი რუსეთიდან ნავთობის შესყიდვას გააგრძელებს. წყაროებმა, საკითხის სენსიტიურობიდან გამომდინარე, ანონიმურად დარჩენა ისურვეს.
