აშშ-ის პრეზიდენტმა დონალდ ტრამპმა განაცხადა, რომ აწესებს 50%-იან ფართომასშტაბიან საბაჟო გადასახადს ბრაზილიიდან აშშ-ში შემოსულ ყველა პროდუქტზე, რაც უკავშირდება ბრაზილიის ყოფილი პრეზიდენტის ჟაირ ბოლსონარუს მიმართ მოპყრობას და ამერიკული პლატფორმების მიმართ ცენზურის ბრალდებებს.

ოთხშაბათს Truth Social-ზე გამოქვეყნებულ წერილში ტრამპმა ბოლსონარუს გასამართლების პროცესი "საერთაშორისო სირცხვილად" შეაფასა და აღნიშნა, რომ "ეს საქმე საერთოდ არ უნდა მომხდარიყო. ეს ჯადოქრებზე ნადირობაა და დაუყოვნებლივ უნდა შეწყდეს!" და ბოლსონარუ შეაქო, როგორც "მსოფლიოში უაღრესად პატივსაცემი ლიდერი მისი მმართველობის პერიოდში".

ბოლსონარუს და მასთან ერთად შვიდ პირს ბრალი წაუყენეს გადატრიალების მცდელობაში მას შემდეგ, რაც ბრაზილიის უმაღლესმა სასამართლომ დააკმაყოფილა ბრალდებები ყოფილი ლიდერისა და მისი მოკავშირეების წინააღმდეგ. უმაღლესმა სასამართლომ ერთსულოვნად ხუთი ხმით არც ერთის წინააღმდეგ გადაწყვიტა, რომ ბოლსონარუს წინააღმდეგ წაყენებული ბრალდებები სისხლის სამართლის საქმის აღძვრას საჭიროებს. ყოფილ პრეზიდენტს, დამნაშავედ ცნობის შემთხვევაში, 30 წლამდე თავისუფლების აღკვეთა ემუქრება.

ტრამპმა ბრაზილიის უმაღლეს სასამართლოს აშშ-ის სიტყვის თავისუფლების დარღვევაში დასდო ბრალი და განაცხადა, რომ მათ "აშშ-ის სოციალური მედიის პლატფორმებს ასობით საიდუმლო და უკანონო ცენზურის ბრძანება მისცეს, მილიონობით დოლარის ჯარიმებით და ბრაზილიის სოციალური მედიის ბაზრიდან გაძევების მუქარით".

საჭიროა უსამართლობის გამოსწორება

აშშ ბრაზილიიდან იმპორტზე 1 აგვისტოდან 50%-იან საბაჟო გადასახადს დააწესებს. "50%-იანი გადასახადის თავიდან აცილების მიზნით რეექსპორტირებული საქონელიც ამ უფრო მაღალი გადასახადით დაიბეგრება", - განაცხადა ტრამპმა და დასძინა: "გთხოვთ, გაიგოთ, რომ 50%-იანი მაჩვენებელი გაცილებით დაბალია იმ მაჩვენებელზე, რაც საჭიროა თანაბარი პირობების უზრუნველსაყოფად, რომელიც ჩვენს ქვეყანას უნდა ჰქონდეს თქვენთან".

ტრამპმა განაცხადა, რომ ეს გადაწყვეტილება აუცილებელია იმ უსამართლობის გამოსასწორებლად, რასაც მისი თქმით "რეჟიმი" აკეთებს და გააფრთხილა ბრაზილია, რომ საპასუხო ნაბიჯების შემთხვევაში დამატებით გადასახადები დაწესდება.

"რაც უფრო მეტად აირჩევთ გადასახადების გაზრდას, ეს ოდენობა დაემატება ჩვენს მიერ დაწესებულ 50%-იან გადასახადს".

ოთხშაბათს, ხუთი აფრიკული ქვეყნის წარმომადგენლებთან შეხვედრაზე, ტრამპმა აღნიშნულ გადასახადებზე საუბრისას თქვა, რომ ისინი "საღ აზრზეა დაფუძნებული, დეფიციტზე დაფუძნებული, იმაზე დაფუძნებული, თუ როგორ გვეპყრობოდნენ წლების განმავლობაში და უბრალოდ უხეშ ციფრებზე დაფუძნებული" და დასძინა: "მაგალითად, ბრაზილია კარგად არ გვეპყრობოდა. არასდროს მოგვქცევია კარგად".