აშშ-ის პრეზიდენტმა დონალდ ტრამპმა განაცხადა, რომ ორი ატომური წყალქვეშა გემი, რომელთა განლაგებაც რუსეთის ყოფილი ლიდერის, დიმიტრი მედვედევის განცხადებების შემდეგ ბრძანა, "იქ, სადაც უნდა ყოფილიყვნენ", ჩავიდნენ.

ტრამპმა, ნიუ ჯერსიში მდებარე გოლფის კლუბიდან გამგზავრებამდე ჟურნალისტებთან საუბრისას, წყალქვეშა ნავების ადგილმდებარეობის შესახებ კითხვაზე უპასუხა: "ისინი რეგიონში არიან, დიახ, იქ არიან, სადაც უნდა იყვნენ".

მანამდე ტრამპმა განაცხადა, რომ მედვედევთან დაძაბულობის გამწვავების გამო, ორი ატომური წყალქვეშა გემის "შესაბამის რეგიონებში" განლაგების ბრძანება გასცა.

გასულ ორშაბათს მედვედევმა ტრამპს მკაცრად მიმართა და გააფრთხილა, რომ უკრაინის ომთან დაკავშირებით კრემლზე მზარდი ზეწოლა არა მხოლოდ რუსეთ-უკრაინის, არამედ რუსეთ-აშშ-ს შორის უფრო ფართო კონფლიქტის პროვოცირების რისკს შეიცავს.

ეს განცხადება ტრამპის მხრიდან რუსეთის მიმართ მუქარის შემდეგ გაკეთდა, რომ თუ ის უკრაინაში ომს "დაახლოებით 10-12 დღეში" არ დაასრულებს, სანქციებსა და მეორად საბაჟო გადასახადებს დაუწესებს. ტრამპმა ივლისში გაცხადებულ 50-დღიან ვადაზე გაცილებით ადრეული თარიღი დაასახელა.

"რუსეთი კარგად ახერხებს სანქციების თავიდან აცილებას"

ტრამპმა აღნიშნა, რომ რუსეთი "სანქციების თავიდან აცილებას საკმაოდ კარგად" ახერხებს და დასძინა: "მათ შეუძლიათ სანქციების თავიდან აცილება, თუკი იქნება შეთანხმება, რომლის შედეგადაც ადამიანების მკვლელობა შეწყდება".

ტრამპმა ჟურნალისტებს განუცხადა: "სანქციები იქნება, მაგრამ, როგორც ჩანს, ისინი საკმაოდ კარგად ახერხებენ სანქციების თავიდან აცილებას".

"ძალიან ბევრი რუსი ჯარისკაცი იღუპება, ისევე როგორც უკრაინაში, ნაკლები რაოდენობით, მაგრამ მაინც ათასობით ადამიანი... ამ აბსურდულ ომში ძალიან ბევრი ადამიანი იღუპება", - თქვა ტრამპმა და კვლავ გაიმეორა უკრაინაში ომის დასრულების სურვილი.

"ჩვენ ბევრი ქვეყნის ომში ჩართვა შევაჩერეთ ... ჩვენ ამ ომსაც (რუსეთ-უკრაინას) შევაჩერებთ", - განაცხადა აშშ-ის პრეზიდენტმა და დასძინა, რომ მისი სპეციალური წარმომადგენელი სტივ ვიტკოფი მომავალ კვირას რუსეთს ეწვევა.

ტრამპმა თქვა, რომ ვიტკოფი რუსეთში "შესაძლოა, მომავალ კვირას, ოთხშაბათს ან ხუთშაბათს" გაემგზავრება. ეს ვიზიტი აშშ-ის სანქციების ულტიმატუმის ვადამდე განხორციელდება.