პრეზიდენტმა დონალდ ტრამპმა განაცხადა, რომ აშშ-სა და სამხრეთ კორეას შორის ახალი სავაჭრო შეთანხმება შედგა, რომელიც ითვალისწინებს სამხრეთ კორეიდან აშშ-ში ექსპორტზე 15%-იანი საბაჟო გადასახადის დაწესებას.
ოთხშაბათს ტრამპმა Truth Social-ის პლატფორმაზე დაწერა: "მოხარული ვარ განვაცხადო, რომ შეერთებული შტატები და კორეის რესპუბლიკა შეთანხმდნენ სრულ და ყოვლისმომცველ სავაჭრო შეთანხმებაზე".
ტრამპმა განაცხადა, რომ შეთანხმება მოიცავს სამხრეთ კორეის მიერ აშშ-ში 350 მილიარდი დოლარის ინვესტიციის ვალდებულებას და რომ ეს ინვესტიციები „აშშ-ს საკუთრებაში იქნება და კონტროლს დაექვემდებარება, ასევე შეირჩევა პირადად მის, როგორც პრეზიდენტის მიერ“.
მან ასევე აღნიშნა, რომ სამხრეთ კორეა 100 მილიარდი დოლარის ღირებულების თხევად ბუნებრივ აირს (LNG) და სხვა ენერგოპროდუქტებს შეიძენს.
„სამხრეთ კორეა დათანხმდა ინვესტიციების მიზნით დიდი თანხის დაბანდებას“, - თქვა მან.
ტრამპის თქმით, შეთანხმების ფარგლებში, სამხრეთ კორეა აშშ-ს პროდუქტებისთვის, განსაკუთრებით ავტომობილებისთვის, სატვირთო ავტომობილებისთვის და სასოფლო-სამეურნეო პროდუქტებისთვის ბაზრებს სრულად გახსნის. სანაცვლოდ, სამხრეთ კორეის ექსპორტი აშშ-ში დაექვემდებარება 15%-იან საბაჟო გადასახადს, ხოლო ამერიკული პროდუქცია სამხრეთ კორეაში გადასახადის გარეშე შევა.
კვირის დასაწყისში ტრამპმა განაცხადა, რომ მისმა ადმინისტრაციამ სავაჭრო შეთანხმებას მიაღწია პაკისტანთანაც და რომ მოლაპარაკებები სხვა ქვეყნებთანაც გრძელდება მის მიერ განსაზღვრულ 1 აგვისტომდე.