ایرانی سرکاری میڈیا کے مطابق ہفتے کے روز ایران کے جنوبی شہر بندر عباس میں شاہد رجائی بندرگاہ پر ایک بڑا دھماکہ ہوا، جس کے نتیجے میں کم از کم 115 افراد زخمی ہو گئے۔

یہ دھماکہ اس وقت ہوا جب ایران اور امریکہ کے درمیان عمان میں جوہری مذاکرات کے تیسرے دور کا آغاز ہوا تھا، تاہم دھماکے کی وجہ فوری طور پر واضح نہیں ہو سکی۔

ایک مقامی بحران انتظامیہ کے اہلکار نے سرکاری ٹی وی کو بتایا، "اس واقعے کی وجہ شاہد رجائی بندرگاہ کے علاقے میں ذخیرہ شدہ کئی کنٹینرز  میں دھماکہ تھا۔ ہم اس وقت زخمیوں کو طبی مراکز منتقل کر رہے ہیں۔"

نیم سرکاری نیوز ایجنسی تسنیم  نے مزید بتایا کہ بندرگاہ کی سرگرمیاں آگ بجھانے کے لیے معطل کر دی گئی ہیں اور چونکہ بندرگاہ  پر  ملازمین کی کثیر تعداد موجود تھی، "بہت سے افراد ممکنہ طور پر زخمی یا حتیٰ کہ ہلاک بھی ہو سکتے ہیں۔"

ایرانی میڈیا کے مطابق، دھماکے نے کئی کلومیٹر کے دائرے میں مکانات کی  کھڑکیوں  کے شیشے توڑ ڈالے، اور آن لائن شیئر کی گئی ویڈیوز میں دھماکے کے بعد ایک مشروم نما دھوئیں کا بادل بنتا ہوا دکھایا گیا۔

2020 میں، اسی بندرگاہ کے کمپیوٹرز پر ایک سائبر حملہ ہوا تھا جس کی وجہ سے آبی گزرگاہوں اور بندرگاہ کی طرف جانے والی سڑکوں پر شدید رکاوٹیں پیدا ہوئیں۔ واشنگٹن پوسٹ نے رپورٹ کیا تھا کہ ایران کے حریف اسرائیل  کا اس میں ہاتھ ہو سکتا ہے جو کہ  ایک ایرانی سائبر حملے کا جواب تھا۔