اامریکی ریاست ورمونٹ کے ایک وفاقی جج نے ترک پی ایچ ڈی طالبہ رومیسہ اوزترک کی ضمانت پر رہائی کا حکم دیا ہے، جنہیں مارچ کے آخر میں امیگریشن ایجنٹس نے متنازع طور پر حراست میں لیا تھا۔

جج ولیم کےسیشنز III نے جمعہ کو کہا، "عدالت یہ سمجھتی ہے کہ وہ کمیونٹی کے لیے خطرہ نہیں ہیں اور نہ ہی ان کے فرار ہونے کا کوئی خدشہ ہے۔ عدالت حکومت کو حکم دیتی ہے کہ محترمہ اوزترک کو فوری طور بری کیا جائے۔"

جج نے مزید کہا کہ اوزترک کو اپنے گھر میساچوسٹس واپس جانے کی اجازت ہے۔

انہوں نے کہا، "انہیں میساچوسٹس اور ورمونٹ جانے کی بھی آزادی ہے، اور میں ان پر سفر کی کوئی پابندی نہیں لگاؤں گا، کیونکہ  مجھے نہیں لگتا کہ وہ فرار ہونے کا کوئی خطرہ پیدا کرتی ہیں۔"

جج نے کہا کہ اوزترک کے کیریئر کے لیے ضروری ہے کہ وہ ریاست سے باہر کے پروگراموں میں شرکت کریں اور لیکچرز دیں۔

انہوں نے مزید کہا، "اور ان کے کیریئر کے ایک حصے کے طور پر، میں سمجھتا ہوں کہ وہ خوش قسمت ہیں کہ ان علاقوں سے باہر سفر کر سکتی ہیں۔"

اوزترک، جو ٹفٹس یونیورسٹی میں ڈاکٹریٹ کی طالبہ ہیں، نے ورمونٹ کے شہر برلنگٹن میں عدالت کی سماعت میں آن لائن  شرکت کی، جو ان کی 25 مارچ کو میساچوسٹس میں امیگریشن اور کسٹمز انفورسمنٹ (ICE) ایجنٹس کے ہاتھوں گرفتاری کے چھ ہفتے بعد ہوئی۔ ان پر الزام تھا کہ انہوں نے گزشتہ سال اسرائیل-فلسطین تنازع پر اسکول کے طلبہ کے اخبار میں ایک مضمون تحریر کیا تھا۔

یہ سماعت اس وقت ہوئی جب اس ہفتے کے شروع میں سیکنڈ سرکٹ کورٹ آف اپیلز نے حکم دیا کہ اوزترک کو لوزیانا کی ریاست میں امیگریشن جیل سے ورمونٹ کی وفاقی ضلعی عدالت میں منتقل کیا جائے۔

امریکن سول لبرٹیز یونین کے وکلاء نے دلیل دی کہ ان کی حراست ان کے آئینی حقوق، بشمول آزادی اظہار اور مناسب عمل، کی خلاف ورزی کرتی ہے۔

میرا پی ایچ ڈی مکمل کرنا میرے لیے بہت اہم ہے

سماعت کے دوران، اوزترک نے کہا کہ حراست کے دوران انہیں دمے کے بڑھتے ہوئے حملوں کا سامنا کرنا پڑا ہے، جن کے محرکات میں دباؤ، کیڑوں اور چوہوں کے فضلے، اور تازہ ہوا کی کمی شامل ہیں۔

انہوں نے کہا، "میرا ماننا ہے کہ اس کی مختلف وجوہات ہیں۔ سب سے پہلے، جیسا کہ میں نے اپنے بیانات میں بیان کیا، غلط حالات ایک دمے کے مریض کے لیے واقعی چیلنجنگ ہیں، کیونکہ ان محرکات کا مسلسل سامنا ہوتا ہے، جیسے مناسب ہوا کے گزر کی کمی۔ جب ہمیں ضرورت ہوتی ہے ہمیں تازہ ہوا لینے کی اجازت نہیں دی جاتی ۔"

اوزترک نے کہا کہ انہیں  صفائی کے سامان کے حصول میں مشکلات کا سامنا کرنا پڑا۔

جب ان سے پوچھا گیا کہ اگر عدالت انہیں ضمانت دیتی ہے تو ان کے کیا منصوبے ہیں، اوزترک نے کہا کہ ان کا لیز مئی میں ختم ہو جائے گا اور وہ "جیسے ہی" رہا ہوں گی، ٹفٹس یونیورسٹی کے ہاسٹل میں منتقل ہو جائیں گی۔

انہوں نے مزید کہا، "میرا پی ایچ ڈی مکمل کرنا میرے لیے بہت اہم ہے۔ میں نے اس پی ایچ ڈی کے لیے طویل عرصے تک کام کیا ہے۔ میں گزشتہ سات سالوں سے گریجویٹ اسکول میں ہوں۔

جو کام میں کرتی ہوں وہ میرے لیے واقعی معنی خیز ہے، کیونکہ میرا ماننا ہے کہ میں اپنی بہترین کوشش کر رہی ہوں کہ سیکھوں، بڑھوں، جڑوں، ایک ماہر  سائنسدان کے طور پر ترقی کروں، ایک بچے کی ترقی کی اسکالر کے طور پر، اور دنیا بھر کے بچوں کی فلاح و بہبود اور ترقی میں اپنا حصہ ڈالوں۔"

اوزترک کا عارضہ دمہ 'نمایاں طور پر' بگڑ گیا ہے

گواہ ڈاکٹر جیسیکا مک کینن نے کہا کہ اوزترک کا دمہ "نمایاں طور پر" بگڑ گیا ہے۔

انہوں نے کہا، "تو وہ اس وقت ایک ایسی جگہ پر رہ رہی ہیں جو ... 14 لوگوں کے بیٹھنے کے لیے ڈیزائن کی گئی ہے، اور وہ بنیادی طور پر 23 دیگر خواتین کے ساتھ اس جگہ  میں قید ہیں جہاں بہت زیادہ نمی ہے... اور ڈٹرجنٹس، شیمپو، صفائی کے سامان کی تیز بو کے  ماحول میں ۔۔۔ اس کے علاوہ انہیں شدید دباوّ  کا سامنا  ہے۔ یہ تمام عوامل  دمے کے مرض کو مزید پیچیدہ بنا دیتے ہیں ۔"

جب مک کینن اپنے خیالات پیش کر رہی تھیں، اوزترک کو دمے کا حملہ ہوا اور انہیں باتھ روم جانے کی اجازت دی گئی۔

مک کینن نے کہا، "اگر وہ حراست میں رہتی ہیں، تو میرا ماننا ہے کہ ان کا مرض مزید ابتر ہو جائےہو جائے گا۔"

ایک اور گواہ، سارہ جانسن، جو ٹفٹس یونیورسٹی کے ڈیپارٹمنٹ آف اسٹڈی ڈیولپمنٹ میں گریجویٹ اسٹڈیز کی ڈائریکٹر ہیں، نے کہا کہ اوزترک ایک پروجیکٹ پر ریسرچ اسسٹنٹ کے طور پر مقرر ہیں۔

جانسن نے کہا، "وہ اس پروجیکٹ پر ہماری میڈیا ماہر ہیں۔ ان کی مہارت بالکل ضروری ہے۔"

جانسن نے کہا کہ حراست میں رہتے ہوئے، اوزترک کو دسمبر کی آخری تاریخ تک اپنا مقالہ مکمل کرنے کا خطرہ ہے،  وہ پہلے  ہی دیگر پروجیکٹس سے محروم ہو چکی ہیں۔

انہوں نے مزید کہا، "ایک بالکل اہم موقع جس سے وہ محروم ہوئیں ...  انہوں نے ایک بڑی پیشہ ورانہ کانفرنس میں اپنا کام پیش کرنا تھا۔ انہیں گزشتہ ہفتے وہاں پیش کرنے کے لیے مقرر کیا گیا تھا۔"