اسرائیلی میڈیا نے رپورٹ کیا ہے کہ مقبوضہ مغربی کنارے میں فلسطینیوں کو آبادکاروں کے حملوں میں شدید اضافے کا سامنا ہے، جبکہ موجودہ حکومت کے دوران غیر قانونی بستیوں کی تعداد میں 40 فیصد اضافہ ہوا ہے۔

 اسرائیلی چینل 12 نے جمعہ کو اطلاع دی ہے  کہ 2022 کے آخر میں بنیامین نیتن یاہو کی حکومت کے قیام کے بعد سے مقبوضہ مغربی کنارے میں غیر قانونی اسرائیلی بستیوں میں تیزی سے اضافہ ہوا ہے۔

رپورٹ کے مطابق، مغربی کنارے میں غیر قانونی بستیوں کی تعداد 128 سے بڑھ کر 178 ہو گئی ہے، جو کہ  تقریباً 40 فیصد اضافے  کے مترادف ہے ، دوسری جانب  فلسطینیوں کے مکانات کی بے مثال مسماری بھی جاری ہے۔

یہ رپورٹ اس وقت سامنے آئی جب نیتن یاہو کی لیکوڈ پارٹی کے 14 وزراء اور کنیسٹ کے اسپیکر امیر اوہانا نے ایک خط پر دستخط کیے جس میں نیتن یاہو سے مطالبہ کیا گیا کہ وہ مقبوضہ علاقے کو فوری طور پر اسرائیل میں ضم کریں۔

گزشتہ ہفتے، 28 جون کو مغربی کنارے کے مرکزی علاقے میں واقع قصبے کفر مالک پر آبادکاروں کے مہلک حملے میں تین فلسطینی جاں بحق اور سات زخمی ہوئے۔

ٹی وی کے مطابق ، "نئی بستیوں کے اعلان، غیر قانونی چوکیوں کے قیام کی بے مثال رفتار، اسٹریٹجک سڑکوں کی تعمیر، اور فلسطینی عمارتوں کی بڑے پیمانے پر مسماری کا مقصد علاقے پر یہودی کنٹرول کو مضبوط کرنا اور دو ریاستی حل کو مؤثر طریقے سے ختم کرنا ہے۔"

چینل نے دائیں بازو کی تنظیم ریگاوی کے سی ای او میر ڈوئچ کے حوالے سے کہا، "کسی بھی حکومت نے آبادکاری کو اس حد تک فروغ نہیں دیا جتنا کہ موجودہ حکومت نے۔"

رپورٹ کے مطابق، موجودہ حکومت کے قیام کے بعد سے مقبوضہ مغربی کنارے میں کم از کم 50 نئی غیر قانونی بستیوں کا اعلان کیا گیا ہے۔

تحقیق کے مطابق، ان میں سے 19 بستیوں کو پہلے ہی تسلیم کیا جا چکا ہے، سات چراگاہی فارم ہیں، 14 بستیوں کے محلے ہیں۔

چینل نے مزید کہا کہ "پچھلے ڈھائی سالوں میں خاص طور پر 2025 کے اوائل سے مغربی کنارے میں موجودہ بستیوں میں تعمیرات نے ریکارڈ توڑ دیے ہیں ۔"

چینل نے وضاحت کی کہ 41,709 غیر قانونی آبادکار گھروں کی منظوری دی گئی ہے، جو نیتن یاہو کی حکومت سے پہلے کے چھ سالوں میں ریکارڈ کی گئی تعداد سے زیادہ ہے۔

چینل کے مطابق، 2024 کے آخر تک مغربی کنارے میں غیر قانونی بستیوں کی تعداد 214 تک پہنچ گئی، جن میں سے 66 غزہ میں اسرائیلی نسل کشی کے دوران قائم کی گئیں۔

چینل کے مطابق، موجودہ حکومت کے پہلے دو سالوں میں بستیوں کی تعداد پچھلے دو سالوں کے مقابلے میں تقریباً 300 فیصد بڑھ گئی۔

چینل نے کہا کہ زیادہ تر غیر قانونی بستیوں کا قیام چراگاہی چوکیوں کی شکل میں ہوا ہے، جو وسیع علاقوں پر قابض ہیں، اور اس وقت تقریباً 787 مربع کلومیٹر پر محیط ہیں، جن میں زیادہ تر وسطی اور مشرقی مغربی کنارے میں ہیں۔

چینل نے نوٹ کیا کہ مغربی کنارے کی بستیوں کی کونسل یشا کے اعداد و شمار سے واضح ہوتا ہے بستیوں کی تعمیر میں اضافے کے ساتھ غیر قانونی آبادکاروں کی تعداد میں بھی اضافہ ہوا ہے، اور 2013 سے 2023 کے درمیان مغربی کنارے میں آبادکاروں کی تعداد 38 فیصد بڑھ کر 374,000 سے 517,000 ہو گئی ہے۔