ایرانیوں نے جمعہ کے روز انتقام کا مطالبہ کیا، اسرائیل کی جانب سے حملوں کی ایک زبردست لہر کے جواب میں فوری کارروائی کا مطالبہ کیا۔ کچھ لوگ احتجاج کے لیے سڑکوں پر نکل آئے، جبکہ دیگر یہ سوچتے ہوئے کہ آگے کیا ہوگا پناہ گاہوں میں ہیں۔

فضائی حملوں میں فوج کے کئی اعلیٰ افسران مارے گئے، اہم سائنسدانوں کو نشانہ بنایا گیا اور ایران کے فوجی اور جوہری مقامات پر حملے کیے گئے، جس نے عوام میں غصے کی لہر پیدا کر دی۔

احمد معادی نامی ایک62 سالہ ریٹائرڈ شخص نے کہا، "ہم کب تک خوف میں جئیں گے؟ ایک ایرانی کے طور پر، میں سمجھتا ہوں کہ وسیع پیمانے کا  اور سخت جواب ضروری ہے۔"

یہ حملے طویل عرصے سے دشمنوں کو مکمل جنگ کی طرف دھکیلتے نظر آئے، جو پہلے زیادہ تر پراکسیز کے ذریعے ایک خفیہ جنگ لڑ رہے تھے۔

ایران باقاعدگی سے ان افراد کو گرفتار کرتا ہے جن پر اسرائیل کے لیے جاسوسی کا الزام ہوتا ہے، جبکہ حالیہ برسوں میں اس کے جوہری پروگرام کو نشانہ بنانے والے قتل اور تخریب کاری کے واقعات بھی جاری ہیں۔

جمعہ کے حملوں میں ایران کے جوہری پروگرام سے وابستہ کم از کم چھ سائنسدان مارے گئے۔

معادی نے اسرائیل کے امریکی اتحادی کے ساتھ ایران کے جوہری مذاکرات کے حوالے سے کہاکہ" انہوں نے اتنے سارے یونیورسٹی پروفیسرز اور محققین کو قتل کر دیا، اور اب وہ مذاکرات کرنا چاہتے ہیں؟"

جب ایران نقصان کا جائزہ لے رہا تھا، تہران کی سڑکوں پر کچھ شہری جمع ہو کر "اسرائیل مردہ باد، امریکہ مردہ باد" کے نعرے لگا رہے تھے، ایرانی جھنڈے اور سپریم لیڈر علی خامنہ ای کی تصاویر لہرا رہے تھے۔

سرکاری ٹی وی کے مطابق ملک کے دیگر شہروں میں بھی اسی طرح کے مظاہرے کیے گئے۔

یہ اسرائیلی حملے وزیر اعظم بنیامین نیتن یاہو کی بار ہا دھمکیوں کے بعد ہوئے، جو ایران کے جوہری پروگرام پر حملہ کرنے کی کئی سالہ کوششوں کا انجام معلوم ہوتے ہیں۔

تہران کے رہائشی عباس احمدی نے اپنی گاڑی کے پیچھے سے کہا، "ہم اسے جاری نہیں رہنے دے سکتے، ورنہ ہم غزہ کی طرح ہو جائیں گے۔ ایران کو اسے تباہ کرنا ہوگا، کچھ کرنا ہوگا۔"

جمعہ کے حملے ایک سال سے زیادہ عرصے سے جاری کشیدگی کے بعد ہوئے، جب اسرائیل نے لبنان میں ایران کے علاقائی اتحادی حزب اللہ اور یمن میں حوثیوں کے خلاف کارروائی کی۔

کشیدگی کے دوران، اسرائیل اور ایران نے گزشتہ سال دو مختلف مواقع پر فضائی حملے کیے، لیکن مکمل جنگ سے گریز کیا۔

لیکن جمعہ کے حملے کے بعد، یہ کہنا مشکل تھا کہ آگے کیا ہوگا، کیونکہ خامنہ ای نے اسرائیل کو "تلخ اور دردناک" انجام کی دھمکی دی، جبکہ ایرانی فوج نے کہا کہ اس کے جواب میں "کوئی حد نہیں ہوگی"۔

چند مظاہروں کے علاوہ ماسوائے پٹرول اسٹیشنوں پر قطاروں کے، جو بحران کے وقت ایک عام منظر ہے، ، تہران کی سڑکیں زیادہ تر سنسان ہیں۔

تہران کے امام خمینی بین الاقوامی ہوائی اڈے پر فضائی ٹریفک معطل کر دی گئی، جبکہ پورے خطے میں ہوائی ٹریفک میں خلل پڑا ہے۔

شمالی تہران کے پوش علاقے نوبنیاد میں، امدادی کارکن اسرائیلی حملوں میں نشانہ بننے والے دو اپارٹمنٹ بلاکس کے ملبے کو ہٹا رہے ہیں۔

قریبی علاقے میں پر نم آنکھوں کے ساتھ خاندان جمع تھے۔

ایک 56 سالہ شہری احمد رزاقی نے سرکاری مؤقف کو دہراتے ہوئے کہا "وہ ہمیں ہماری جوہری صلاحیت سے محروم کرنا چاہتے ہیں — یہ ناقابل قبول ہے۔"

فرنوش رضائی، 45 سالہ نرس، نے کہا کہ جمعہ کے حملے اسرائیل کی جانب سے آخری کارروائی کی نمائندگی کرتے ہیں — ایک ملک جو "اپنی آخری سانسیں لے رہا ہے"۔

ایرانی رہنما دہائیوں سے اصرار کرتے آئے ہیں کہ اسرائیل جلد "غائب" ہو جائے گا۔ رضائی نے کہا، "اگر خدا نے چاہا، تو کم از کم اس سے کچھ سکون آئے گا۔"