جنوبی کوریا کی اپوزیشن ڈیموکریٹک پارٹی نے یہ کہتے ہوئے کہ ملک کو انتظار میں رکھنا "غیر ذمہ دارانہ" فعل  ہے  جو سماجی تقسیم کو مزید  طول دے رہا ہے پیر کے روز ملک کی آئینی عدالت سے مطالبہ کیا کہ وہ صدر یون سک یول کے مواخذے پر جلد فیصلہ کرے۔

آٹھ رکنی عدالت نے تیسرے ہفتے میں بھی غور و خوض جاری رکھا ہوا ہے، جس کے دوران سیاسی کشیدگی میں اضافہ ہوا ہے۔ ایک طرف کچھ لوگ  دسمبر میں مختصر مارشل لا کے اعلان پر یون کی برطرفی کا مطالبہ کر رہے ہیں، تو  دوسری طرف  ان کے حمایتی  ان کی بحالی کے حق میں  ہیں۔

عدالت میں  25 فروری کو مقدمے کی پیشی ہونے والے  یون نے کہا تھا کہ ان کا مارشل لا کا اعلان "ریاست مخالف" عناصر کو ختم کرنے کے لیے ضروری تھا، لیکن ان کا مکمل فوجی ہنگامی حالت نافذ کرنے کا کوئی ارادہ نہیں تھا۔

ڈیموکریٹک پارٹی کے رہنما کم من سوک نے پارٹی اجلاس میں کہا، "ملک اور عوام ایک نازک موڑ پر پہنچ چکے ہیں۔ ہم عدالت کے ذمہ دارانہ فیصلے کا انتظار کرتے ہیں۔ مزید تاخیر غیر معمولی اور غیر ذمہ دارانہ ہے۔"

یاد رہے کہ 2017میں، سابق صدر پارک گن ہائے کو آئینی عدالت میں ان کے مواخذے کے مقدمے میں حتمی دلائل کے 11 دن بعد عہدے سے ہٹا دیا گیا تھا۔

جنوبی کوریا ئی  عوام نے دارالحکومت سیول میں بڑی تعداد میں مجمع لگایا اور کہا تاخیر مایوس کن ہے اور الجھن کو مزید بڑھا رہی ہے، انہوں نے  قدامت پسند رہنما کی برطرفی کا مطالبہ کیا ۔

دسمبر میں ڈیموکریٹک پارٹی کے زیر کنٹرول پارلیمنٹ نے آئینی فرائض کی خلاف ورزی پر یون کے مواخذے کا فیصلہ کیا تھا۔ مواخذے کی تحریک میں کہا گیا کہ انہوں نے ایسے اقدامات کیے جو قانون کی حکمرانی کے لیے سنگین خطرہ ہیں اور انہیں عہدے کے لیے نااہل قرار دیتے ہیں۔

یون پر ایک الگ مجرمانہ مقدمہ بھی چل رہا ہے، جس میں ان پر بغاوت کی قیادت کرنے کا الزام ہے، جو موت یا عمر قید کی سزا کا حامل ایک جرم ہے۔

یون کے مارشل لا کے اعلان کے اثرات نے قدامت پسندوں اور لبرلز کے درمیان اور عوام میں تقسیم کو مزید بڑھا دیا ہے، جس سے اداروں پر دباؤ بڑھ گیا ہے اور حکومت کی پالیسی سازی میں رکاوٹ پیدا ہو رہی ہے۔

ملک کے کچھ اعلیٰ فوجی کمانڈروں کو ان کے مارشل لا کے فرمان میں کردار کے لیے معطل کر دیا گیا ہے اور وہ مجرمانہ مقدمات کا سامنا کر رہے ہیں۔ سابق وزیر دفاع کم یونگ ہیون کے خلاف بغاوت کے الزامات پر مقدمے کی سماعت پیر کو شروع ہو رہی ہے۔

وزیر اعظم ہان ڈک سو، جو یون کے مواخذے اور 14 دسمبر کو اقتدار سے معطل ہونے کے بعد مختصر طور پر قائم مقام صدر تھے، کا بھی مواخذہ کر دیا گیا ہے اور اب ملک کی قیادت وزیر خزانہ چوی سانگ موک کر رہے ہیں۔