Kundi kuu la upinzani nchini Sudan Kusini lilidai Jumatatu uchunguzi wa kimataifa kuhusu madai ya ukiukwaji wa haki katika mapigano ya hivi majuzi yaliyoshuhudia wanajeshi wa serikali wakilenga maeneo yanayomtii kiongozi wa muda mrefu wa kundi hilo, Riek Machar, ambaye yuko chini ya kifungo cha nyumbani.
Machar, Makamu wa Rais wa nchi hiyo ambaye uhasimu wake wa kisiasa na Rais Salva Kiir umetishia mara kwa mara kuirudisha Sudan Kusini katika vita vya wenyewe kwa wenyewe, anatuhumiwa kwa uasi.
Tangu Machi, mapigano yametanda kaskazini, ambapo wanajeshi wa serikali walipambana na wanamgambo wa waasi wanaojulikana kama Jeshi la White, ambalo linaaminika kuwa na mafungamano na Machar, huku makumi ya watu wakiuawa.
Waasi hao walivamia kambi ya jeshi katika mji wa Nasir, ngome ya Machar. Wanajeshi wa serikali walijibu kwa mashambulizi ya anga na pia kushambulia kambi ya vikosi vya upinzani nje ya mji mkuu, Juba.
Mashambulio ya anga na silaha za kemikali
Msemaji Pal Mai Deng kutoka chama cha Machar cha Sudan People's Liberation Movement-In-Opposition alisema jumuiya ya kimataifa inapaswa kuchunguza "mashambulio ya anga kwa kutumia silaha za kemikali" katika maeneo kama vile Nasir.
Hakufafanua. Kauli hiyo imekuja baada ya Shirika la Kutetea Haki za Binadamu la Human Rights Watch wiki iliyopita kuripoti matumizi ya silaha za moto zilizoangushwa kutoka angani na vikosi vya serikali ambavyo "vimeua na kuteketeza makumi ya watu, wakiwemo watoto, na kuharibu miundombinu ya raia katika jimbo la Upper Nile."
Serikali, ambayo imeamuru raia kuondoka katika eneo la Nasir, haikuweza kupatikana mara moja kutoa ufafanuzi. Pamoja na kuzuiliwa nyumbani kwa Machar, washirika wake wengi pia wamezuiliwa.
Silaha za moto huwateketeza waathiriwa, lakini pia husababisha moto ambao unaweza kuharibu mali ya raia kiholela, shirika la haki za binadamu lenye makao yake mjini New York lilisema.
