Kryeministri i Irlandës, Michael Martin, u bëri thirrje vendeve të Bashkimit Evropian (BE) që të vendosin sanksione ndaj kolonëve izraelitë të dhunshëm në Bregun Perëndimor të pushtuar, si dhe ndaj ministrave të ekstremit të djathtë Itamar Ben-Gvir dhe Bezalel Smotrich, për rolin e tyre në përshkallëzimin e tensioneve.

Duke folur para samitit të Këshillit Evropian në Bruksel të enjten, Martin theksoi se BE-ja duhet të ndërmarrë hapa më të fortë, përfshirë rishikimin e Marrëveshjes së Asociimit me Izraelin, për të garantuar respektimin e standardeve ndërkombëtare të të drejtave të njeriut.

Ai gjithashtu kritikoi Izraelin për hedhjen poshtë të raporteve të pavarura mbi situatën humanitare në Gaza, duke i bërë thirrje që të përballet me vlerësime objektive, në vend që t’i dënojë ato në mënyrë të menjëhershme.

Martin theksoi se Izraeli duhet të ndalojë modelin e vet të minimit të zërave të besueshëm që shprehin shqetësim për situatën në Gaza.