Vetëm 8% e polakëve besojnë se vendi i tyre është i përgatitur për një luftë të mundshme me Rusinë, sipas një sondazhi nga IBRiS.

Sondazhi zbuloi se vetëm 8% e qytetarëve mendojnë se Polonia është e përgatitur për luftë me Rusinë, dhe vetëm 9% besojnë se forcat e armatosura të vendit janë “të pajisura mjaftueshëm” për një konflikt të tillë, raportoi televizioni shtetëror polak TVP World.

Gjithashtu, gjysma e publikut mbështet rritjen e shpenzimeve për mbrojtjen, ndërsa 75% sugjerojnë që NATO-ja duhet të forcojë krahun lindor të saj.

Vetëm 12% e të anketuarve e konsiderojnë të mundshme një sulm rus ndaj Polonisë, ndërsa 15% e shohin si “një mundësi realiste” një sulm ndaj shteteve balltike.

Në rast se një anëtar tjetër evropian i NATO-s do të sulmohej nga Rusia, 67% e të anketuarve thanë se Polonia duhet të ofrojë ndihmë, ndërsa 57% besojnë se SHBA do ta mbështeste Poloninë në rast të një agresioni të armatosur nga Moska.

Ndërkohë, sondazhi tregoi se 52% e polakëve mendojnë se vendi i tyre duhet të mbështesë Ukrainën në forumet ndërkombëtare, por vetëm 35% mbështesin vazhdimin e ndihmës ekonomike për Kievin.

Mbështetja e polakëve për anëtarësimin e Ukrainës në NATO është 37%, ndërsa një përqindje e ngjashme prej 35% mbështet anëtarësimin e Kievit në BE.

Megjithatë, vetëm 15% besojnë se Polonia duhet të dërgojë trupa paqeruajtëse në Ukrainë nëse arrihet një marrëveshje paqeje, ndërsa 64% janë kundër kësaj ideje.