Kryeministri izraelit Benjamin Netanyahu të martën tërhoqi vendimin e tij për të emëruar komandantin në pension të marinës Eli Sharvit si drejtor të ri të shërbimit të sigurisë së brendshme Shin Bet.

Në një deklaratë nga zyra e Netanyahut, thuhet se ai e ka falënderuar Sharvitin për “gatishmërinë për të shërbyer”, por i ka thënë se “pas shqyrtimit shtesë, ai synon të bisedojë me kandidatë të tjerë”.

Sipas mediave izraelite, përfshirë Times of Israel, koalicioni qeverisës ishte kundër emërimit të tij për shkak të mbështetjes së tij për protestat masive në 2023 kundër planeve të qeverisë për të reformuar gjyqësorin.

Të hënën, Netanyahu njoftoi se komandanti i marinës në pension, Eli Sharvit do të bëhej kreu i ri i Shin Bet në vend të Ronen Bar, edhe pse Gjykata e Lartë e Izraelit lëshoi ​​një ndalim të përkohshëm për largimin e Barit deri më 8 prill. Gjykata, megjithatë, lejoi kryeministrin të bisedonte me kandidatët e mundshëm.

Më 21 mars, qeveria e Netanyahut vendosi që mandati i Barr do të përfundojë më 10 prill, nëse deri atëherë nuk emërohet një pasardhës i përhershëm. Kryeministri e mbrojti vendimin, duke përmendur një "mungesë besimi" për trajtimin e Barr-it të sulmit të Hamasit të 7 tetorit 2023, që nisi luftën gjenocidale të Izraelit në Gaza.

Kjo është hera e parë që qeveria izraelite tenton të heqë kreun e Shin Bet. Netanyahu këmbënguli se vendimi i takon degës ekzekutive dhe nuk i nënshtrohet shqyrtimit gjyqësor.

Bar ka lënë të kuptohet se ka motive politike pas largimit të tij, duke sugjeruar se Netanyahu po kërkon "besnikëri personale" që ai nuk mund ta sigurojë.