Presidenti i Ukrainës, Volodymyr Zelensky, deklaroi se çdo lloj negociatash që përfshijnë mundësinë e dorëzimit të territoreve ukrainase nën kontrollin rus vetëm se do të kontribuonin në zgjatjen e luftës.

“Nëse fillojmë të flasim për Krimenë, për territoret tona sovrane dhe të ngjashme, atëherë hyjmë në formatin që dëshiron Rusia: pra zgjatjen e luftës,” tha Zelensky gjatë një konference në Kiev, duke iu përgjigjur një pyetjeje lidhur me pretendimet se një klauzolë e tillë mund të përfshihet në një propozim për paqe nga ShBA, raportoi agjencia Interfax-Ukraina, duke cituar Anadolu Agency.

Zelensky theksoi se, për të mos përsëritur rezultatet e Marrëveshjeve të Minskut, konflikti duhet të trajtohet si një “problem i madh” që duhet zgjidhur hap pas hapi.

Marrëveshjet e Minskut përfaqësonin një sërë marrëveshjesh për vendosjen e armëpushimit mes qeverisë ukrainase dhe separatistëve pro-rusë në Ukrainën juglindore. Ato u nënshkruan në kryeqytetin e Bjellorusisë, Minsk, në vitet 2014 dhe 2015.

Megjithatë, zbatimi i tyre dështoi, pasi të dyja palët akuzuan njëra-tjetrën për shkelje të marrëveshjeve.

Zelensky përsëriti se zgjatja e luftës i shërben vetëm Rusisë dhe kërkoi sërish presion ndërkombëtar të shtuar ndaj Moskës.

Më herët, “The Washington Post” kishte raportuar se ShBA kishte propozuar njohjen formale të aneksimit të Krimesë nga Rusia si pjesë e një marrëveshjeje më të gjerë për paqe për t’i dhënë fund luftës në Ukrainë.