Edicioni i tretë i Konferencës DevSecOps Days Istanbul (Zhvillim, Siguri dhe Operacione), e cila bashkon ekspertë, përfaqësues të sektorit, inxhinierë softuerësh dhe profesionistë të sigurisë kibernetike, ka nisur të mërkurën në Borsa Istanbul.

Ngjarja organizohet nën temën “Inteligjenca Artificiale për DevSecOps”, duke theksuar rolin në rritje të IA-së në proceset e zhvillimit, sigurisë dhe operimit të sistemeve.

Konferenca u hap me “ceremoninë e gongut” të zakonshme të Borsa Istanbul dhe fjalimet përshëndetëse të Kryetarit të Shoqatës së Teknologjisë së Informacionit Mehmet Ali Serttaş, Drejtorit të Informacionit të Borsa Istanbul Erdinc Tutam, CIO-së së Takasbank Taskin Oker, Drejtoreshës për Siguri të Informacionit në Ministrinë e Industrisë dhe Teknologjisë Burcu Doğan Kasabaçı dhe CIO-së së Ministrisë së Financave Mert Ozarar.

Folësit theksuan rolin gjithnjë e më të madh të inteligjencës artificiale në botën e sotme dhe tendencat e reja në sigurinë kibernetike.

Programi dyditor përfshin panele, diskutime dhe punëtori të shumta për praktikat dhe proceset e DevSecOps, si dhe për çështje të sigurisë kibernetike dhe sigurinë e IA-së. Agjencia Anadolu është partneri global për komunikimin e konferencës.

DevSecOps është një metodologji për zhvillimin e aplikacioneve që automatizon integrimin e sigurisë dhe praktikave të saj në çdo fazë të ciklit të zhvillimit të softuerit, nga dizajni fillestar deri te integrimi, testimi, shpërndarja dhe vendosja në përdorim.