Qeveria e Australisë të mërkurën është nxitur të shënjestrojë të paktën dy ministra izraelitë me sanksione, mes fushatës së vazhdueshme gjenocidale të Tel Avivit kundër palestinezëve në Gaza.
"Nevoja për një veprim të tillë është përforcuar nga deklaratat e fundit alarmuese të ministrave në lidhje me sulmin e vazhdueshëm ushtarak të Izraelit në Gaza", tha Qendra Australiane për Drejtësi Ndërkombëtare (ACIJ), duke iu referuar Ministrit izraelit të Financave Bezalel Smotrich dhe Ministrit të Sigurisë Itamar Ben-Gvir.
Smotrich bëri thirrje për shkatërrimin e Rripit të Gazës "brenda pak muajsh", ndërsa Ben-Givr ka kërkuar publikisht një ndalim të plotë të ndihmës humanitare për Rripin e Gazës.
"Zyrtarët izraelitë përgjegjës për mirëmbajtjen e ndërmarrjes së paligjshme të vendbanimeve ose shkeljet e rënda të ligjit ndërkombëtar në Gaza nuk duhet të jenë imunë nga sanksionet", tha ajo.
Rawan Arraf, drejtor ekzekutiv në ACIJ, tha: "Nëse Australia është e përkushtuar ndaj mbrojtjes së së drejtës ndërkombëtare dhe parandalimit të krimeve mizore, ajo mban përgjegjësi ligjore dhe morale për t'u përgjigjur... Nëse Australia do t'i merrte seriozisht detyrimet e saj, ajo do të hapte hetime penale ndaj vërejtjeve alarmuese të Smotrich mbi asgjësimin e Rripit të Gazës. Sanksionet janë një mundësi minimale për të penguar dhe ndëshkuar shkelje të tilla të rënda."
Kjo erdhi një ditë pasi parlamenti i Spanjës miratoi të martën një mocion jo-detyrues duke i bërë thirrje qeverisë të vendosë një embargo armësh ndaj Izraelit në përgjigje të operacioneve të tij ushtarake në Gaza.
Veçmas, Ministrja e Jashtme Australiane Penny Wong i kërkoi Tel Avivit të lejojë një "rifillim të plotë dhe të menjëhershëm të ndihmës për Gazën".
Duke përsëritur kundërshtimin ndaj zgjerimit të operacioneve ushtarake izraelite në Gaza, Wong tha: "Ne dënojmë komentet e neveritshme dhe të skandaloze të bëra nga anëtarët e qeverisë së (Benjamin) Netanyahut në lidhje me këta njerëz (palestinezët) në krizë."
Ushtria izraelite rifilloi sulmet e saj në Rripin e Gazës më 18 mars dhe që atëherë ka vrarë 3.427 persona dhe ka plagosur 9.647 të tjerë, duke shkatërruar një marrëveshje armëpushimi dhe shkëmbimi të të burgosurve që hyri në fuqi në janar, dhe duke shtuar numrin e përgjithshëm të të vdekurve që nga tetori 2023 prej rreth 53.000 personash.
Nëntorin e kaluar, Gjykata Ndërkombëtare Penale lëshoi urdhërarreste për Netanyahun dhe ish-ministrin e tij të Mbrojtjes, Yoav Gallant, për krime lufte dhe krime kundër njerëzimit në Gaza.
Izraeli përballet gjithashtu me një padi për gjenocid në Gjykatën Ndërkombëtare të Drejtësisë për luftën e tij në enklavë.
