Fahrettin Altun, Shefi i Zyrës së Komunikimit në Zyrën e Presidentit të Türkiyes, ka denoncuar përpjekjet sistematike nga grupet pro-Izrael për t'i heshtur zërat që mbrojnë jetën dhe dinjitetin njerëzor në Palestinë. 

Këto grupe po përdorin akuza të rreme për antisemitizëm për të sulmuar ata që kritikojnë politikat e Izraelit, duke përfshirë disa nga institucionet akademike më të njohura në ShBA, si Harvard, Columbia dhe Tufts.

Altun theksoi se bota ka qenë dëshmitare e një gjenocidi të përmasave të mëdha në Palestinë, ku studentë, profesorë dhe individë të ndershëm kanë ngritur zërin kundër pastrimit etnik, pushtimit dhe luftës.

Ai gjithashtu shpjegoi se aleatët e qeverisë Netanyahu po ndërmarrin një gjueti shtrigash ndaj atyre që kanë guximin të flasin kundër politikave të një qeverie që ka ushtruar dhunë sistematike.

Një nga viktimat e kësaj fushate është Prof. Cemal Kafadar, një historian i njohur nga Harvardi, i cili është larguar nga posti i kryetarit të Qendrës për Studime të Lindjes së Mesme për shkak të akuzave të pavërteta dhe të gjera për antisemitizëm. 

Altun e cilësoi këtë si një shkelje të lirive akademike dhe të shprehjes, vlera të cilat ShBA-ja ka pretenduar t’i mbrojë për dekada.

Ai u bëri thirrje institucioneve akademike në ShBA dhe Evropë që të kundërshtojnë çdo tentativë për t'i ndëshkuar individët për aktivizmin e tyre propalestinez dhe t'i mbrojnë vlerat universale të lirisë dhe të drejtësisë. Sipas Altunit, nëse këto grupe arrijnë t'i heshtin kritikat legjitime dhe aktivizmin paqësor, kjo do të jetë tradhti ndaj vlerave themelore njerëzore.

Altun përfundoi duke shprehur besimin se drejtësia dhe paqja do të triumfojnë dhe se Palestina do të jetë e lirë.