Policia izraelite ka ndaluar mijëra besimtarë myslimanë palestinezë të hyjnë në Xhaminë Al-Aksa në Jeruzalemin Lindor për faljen e zakonshme të së premtes, duke lejuar vetëm një numër të kufizuar prej rreth 450 personash.

Dëshmitarët për Anadolu thanë se që në agim, forcat izraelite ishin vendosur përreth portave të Qytetit të Vjetër dhe hyrjeve të jashtme të kompleksit të Al-Aksas, duke penguar hyrjen e shumicës së besimtarëve. Ata thanë se pothuajse të gjitha hapësirat e lutjes dhe oborret brenda kompleksit ishin bosh për shkak të kufizimeve.

Të mërkurën mbrëma, policia izraelite rihapi pjesërisht portat e xhamisë pas gati gjashtë ditësh mbyllje totale, duke ndjekur urdhrat e Komandës së Frontit të Brendshëm të ushtrisë izraelite për të parandaluar grumbullimet publike gjatë konfliktit me Iranin.

Qasja në Al-Aksa është kufizuar rëndë që nga fillimi i luftës gjenocidale në Gaza më 7 tetor, me kontrolle më të rrepta të premteve.

Ndërkohë, ushtria izraelite dhe kolonët ilegalë kanë shtuar sulmet në Bregun Perëndimor të pushtuar ndaj palestinezëve, vendeve të tyre të shenjta dhe pronës, përfshirë në Jeruzalemin Lindor. Si pasojë, të paktën 980 palestinezë janë vrarë, rreth 7.000 janë plagosur dhe mbi 17.500 janë ndaluar.

Xhamia Al-Aksa është vendi i tretë më i shenjtë për myslimanët në botë. Hebrenjtë e njohin zonën si Mali i Tempullit, duke pretenduar se aty ndodheshin dy tempuj të lashtë.

Izraeli pushtoi Jerusalemin Lindor gjatë Luftës Arabo-Izraelite të vitit 1967 dhe e aneksoi zyrtarisht në vitin 1980, një veprim që nuk është njohur kurrë nga komuniteti ndërkombëtar.