Shefi i refugjatëve të OKB-së njoftoi të enjten se më shumë se 2 milionë sirianë janë kthyer në atdhe që nga dhjetori.

"Më shumë se dy milionë refugjatë dhe të zhvendosur sirianë janë kthyer në shtëpitë e tyre që nga dhjetori, një shenjë shprese mes tensioneve në rritje në rajon," shkroi Komisioneri i Lartë i Kombeve të Bashkuara për Refugjatët (UNHCR), Filippo Grandi, në platformën X.

Duke theksuar se është në udhëtim nga Libani për në Siri me rastin e Ditës Botërore të Refugjatëve, Grandi përsëriti nevojën për një “zgjidhje politike” në Siri.

“Kjo dëshmon se na duhen zgjidhje politike: jo një tjetër valë destabiliteti dhe zhvendosjeje,” theksoi ai.

Pas viteve të vuajtjeve dhe vështirësive në kampet e refugjatëve, mijëra civilë sirianë kanë nisur të kthehen në vendin e tyre, ndërsa paqja dhe siguria po përforcohen pas rrëzimit të regjimit të Bashar al-Asadit.

Miliona sirianë kishin ikur në shtetet fqinje për të kërkuar siguri, mes shkatërrimeve masive dhe një krize humanitare gjithnjë e më të rëndë nën regjimin e Asadit.

Asadi, udhëheqësi i Sirisë për gati 25 vjet, u arratis në Rusi në dhjetor, duke i dhënë fund regjimit të Partisë Baath, që kishte qenë në pushtet që nga viti 1963.

Ahmad al-Sharaa, i cili drejtoi forcat kundër regjimit për të përmbysur Asadin, u shpall president i përkohshëm në fund të janarit.