Forcat izraelite vazhduan me sulmet brutale dhe nuk i kursyen palestinezët as në ditën e parë të Kurban Bajramit, një prej festave më të shenjta islame, duke kryer një sërë sulmesh ajrore dhe artilerike në të gjithë Rripin e Gazës mëngjesin e së premtes, duke vrarë 11 persona dhe duke plagosur disa të tjerë, sipas dëshmitarëve dhe burimeve mjekësore.
Në jug të Gazës, avionët luftarakë izraelitë kryen disa sulme në Khan Younis, ndërsa artileria e rëndë goditi lagjet e banuara në pjesët qendrore, veriore dhe lindore të qytetit, sipas dëshmitarëve.
Shtyllat e tymit u ngritën mbi jugun e Khan Younisit ndërsa bombardimet dhe sulmet ajrore u intensifikuan.
Sipas burimeve mjekësore, një fëmijë u vra nga forcat izraelite pranë zonës së ndalimit Al-Saraya në Khan Younis. Një civil tjetër humbi jetën nga plagët e marra në një sulm të mëparshëm izraelit në qytet.
Katër palestinezë u vranë dhe disa të tjerë u plagosën kur një dron izraelit goditi një stacion karikimi për telefona celularë, të vendosur mes çadrave ku strehoheshin familje të zhvendosura në perëndim të Khan Younisit.
Në Rafah, forcat izraelite vranë edhe katër palestinezë të tjerë pranë një qendre për shpërndarjen e ndihmave, në të njëjtat vende që ishin shënjestruar më parë nga sulme vdekjeprurëse që nga fundi i muajit të kaluar.
Pas një sulmi ajror izraelit në qytetin Abasan al-Kabira, në lindje të Khan Younisit, ekipet e shpëtimit gjetën një trup nën rrënoja.
Dëshmitarët raportuan gjithashtu se trupat izraelite vazhduan prishjen e ndërtesave në pjesën veriore të Khan Younisit.
Në veri të Gazës, bombardimet e rënda goditën lagjen Al-Tuffah në qytetin e Gazës, ndërsa sulmet ajrore goditën qytetin Jabalia, sipas banorëve.
Në prag të festës së Bajramit, të paktën 41 palestinezë, përfshirë fëmijë, gra dhe gazetarë, u vranë nga sulmet izraelite në zona të ndryshme.
Ky është Bajrami i katërt që shënohet në hijen e luftës në Gaza, e cila që nga 7 tetori 2023 është goditur nga një fushatë e qëllimshme dhe sistematike shfarosjeje.
Izraeli, duke refuzuar thirrjet ndërkombëtare për armëpushim, ka zhvilluar një ofensivë gjenocidale në Gaza që nga tetori i vitit 2023, duke vrarë pothuajse 54.700 palestinezë, shumica prej tyre gra dhe fëmijë. Organizatat humanitare kanë paralajmëruar për rrezikun e urisë për më shumë se dy milionë banorë të enklavës.
Në nëntorin e kaluar, Gjykata Penale Ndërkombëtare lëshoi urdhërarrest për kryeministrin izraelit Benjamin Netanyahu dhe ish-ministrin e Mbrojtjes Yoav Gallant për krime lufte dhe krime kundër njerëzimit në Gaza. Izraeli gjithashtu përballet me një padi për gjenocid në Gjykatën Ndërkombëtare të Drejtësisë për krime lufte ndaj civilëve në enklavë.
