Bllokada izraelite e hyrjes së vaksinave kundër poliomelitit në Gaza po rrezikon jetët e më shumë se 600.000 fëmijëve palestinezë, njoftoi të martën Ministria e Shëndetësisë.

“Bllokimi i hyrjes së vaksinave po pengon zbatimin e fazës së katërt të fushatës për forcimin e parandalimit të poliomelitit”, thuhet në njoftim.

“Më shumë se 602.000 fëmijë janë përballë rrezikut të paralizës së përhershme dhe aftësisë së kufizuar kronike nëse vaksinat nuk lejohen menjëherë”, paralajmëron ministria.

Në deklaratë shtohet se fëmijët në Gaza po përballen me komplikime shëndetësore të pashembullta dhe të rënda për shkak të mungesës së plotë të ushqimit adekuat dhe ujit të sigurt për pije.

Në gusht të vitit 2024, Ministria e Shëndetësisë në Gaza konfirmoi rastin e parë të poliomelitit në këtë territor, te një foshnjë dhjetëmuajshe.

Zbulimi i këtij rasti nxiti fushatën e parë të vaksinimit gjatë luftës gjenocidale të Izraelit kundër Gazës, e cila u zhvillua në tri faza duke filluar nga shtatori.

Sipas zyrtarëve shëndetësorë, në fazën e parë, e cila përfundoi më 12 shtator, u vaksinuan mbi 560.000 fëmijë palestinezë. Faza e dytë përfundoi më 7 nëntor, kur u vaksinuan 556.774 fëmijë nën 10 vjeç në të gjithë Rripin e Gazës. Faza e tretë u zhvillua në shkurt, kur u vaksinuan 590.000 fëmijë.

OKB-ja thekson se fëmijëve në Gaza u duhen dy doza të vaksinës orale kundër poliomelitit për mbrojtje adekuate.

Që nga 2 marsi, Izraeli ka mbyllur kalimet drejt Gazës, duke bllokuar hyrjen e furnizimeve thelbësore në enklavë, pavarësisht shumë raporteve për uri në zonën e shkatërruar nga lufta. Ushtria izraelite më 18 mars rifilloi sulmet në Gaza, duke shkelur armëpushimin dhe marrëveshjen për shkëmbimin e të burgosurve të arritur më 19 janar.

Që nga tetori 2023, Izraeli ka vrarë mbi 51.200 palestinezë në enklavë, shumica gra dhe fëmijë.

Në nëntor të vitit të kaluar, Gjykata Penale Ndërkombëtare lëshoi urdhërarrest për kryeministrin Benjamin Netanyahu dhe ish-ministrin e mbrojtjes Yoav Gallant për krime lufte dhe krime kundër njerëzimit në Gaza.

Izraeli po përballet gjithashtu me një padi për gjenocid në Gjykatën Ndërkombëtare të Drejtësisë për shkak të luftës së tij kundër Gazës.