Türkiye dënoi sot sulmet ajrore të Izraelit në Liban, duke theksuar se ato ishin në kundërshtim me marrëveshjen e armëpushimit.

“Dënojmë sulmet ajrore të Izraelit kundër Libanit në kundërshtim me marrëveshjen e armëpushimit”, tha Ministria e Jashtme turke në një deklaratë.

“Ne qëndrojmë me vendosmëri pranë popullit të Libanit”, tha ministria, duke denoncuar sulmet si dëshmi të “mospërfilljes flagrante të Izraelit ndaj ligjit ndërkombëtar dhe kërcënimit të tij të vazhdueshëm ndaj sigurisë dhe stabilitetit të rajonit”.

Ministria i kërkoi komunitetit ndërkombëtar të marrë një qëndrim të bashkuar kundër asaj që i përshkroi si përpjekje të Izraelit për të krijuar “një gjendje të përhershme konflikti në rajon”.

Një armëpushim i brishtë ka qenë në fuqi në Liban që nga nëntori, duke i dhënë fund muajve të luftës ndërkufitare midis Izraelit dhe Hezbollahut, e cila u përshkallëzua në konflikt të shkallës së plotë në shtator.

Autoritetet libaneze kanë raportuar më shumë se 1.250 shkelje izraelite të armëpushimit, duke përfshirë të paktën 100 viktima dhe më shumë se 330 të plagosur.

Sipas marrëveshjes së armëpushimit, Izraeli duhej të tërhiqej plotësisht nga Libani jugor deri më 26 janar, por afati u zgjat deri më 18 shkurt pasi ai refuzoi ta përmbushte. Izraeli ende mban një prani ushtarake në pesë pika kufitare.