Të paktën 39 palestinezë të tjerë janë vrarë në sulmet ajrore izraelite në Gaza në 24 orët e fundit, duke e çuar numrin e të vdekurve nga lufta gjenocidale e Izraelit që nga tetori 2023 në 51.305, tha sot Ministria e Shëndetësisë e enklavës së shkatërruar nga lufta, transmeton Anadolu.

Në një deklaratë, Ministria tha se 105 persona të tjerë të plagosur janë transferuar në spitale, duke e çuar numrin e të plagosurve nga sulmet izraelite në 117.096.

"Shumë viktima janë ende të bllokuar nën rrënoja dhe në rrugë pasi shpëtimtarët nuk janë në gjendje të arrijnë tek ato", thuhet në deklaratë.

Ushtria izraelite rifilloi ofensivën e saj vdekjeprurëse në Rripin e Gazës më 18 mars dhe që atëherë ka vrarë 1.928 njerëz dhe ka plagosur mbi 5.000 të tjerë, pavarësisht marrëveshjes së armëpushimit dhe shkëmbimit të të burgosurve që hyri në fuqi në janar.

Nëntorin e kaluar, Gjykata Ndërkombëtare Penale lëshoi ​​urdhra arresti për kryeministrin izraelit Benjamin Netanyahu dhe ish-ministrin e tij të mbrojtjes Yoav Gallant për krime lufte dhe krime kundër njerëzimit në Gaza.

Izraeli gjithashtu përballet me një padi gjenocidi në Gjykatën Ndërkombëtare të Drejtësisë për luftën e tij në enklavën palestineze.