2025 жылғы Анталия дипломатия форумында Омуралиев: «Бұл бастамалар түрік дипломатиясының жыл өткен сайын қалай күшейіп келе жатқанының нақты бір мысалы. Түрік дипломатиясы осындай диалогтар, сондай-ақ екіжақты және көпжақты ынтымақтастықтар арқылы тек өңірлік емес, жаһандық деңгейде де елеулі табыстарға жетті», – деді.

Ол әлем бойынша қақтығыс аймақтарындағы жағдайға тоқталып, «Сирия мен басқа да көршілес елдердегі ахуалға, сондай-ақ Ресей–Украина сияқты дағдарыстарға қарасақ, бұл салаларда жүргізілген бастамалар мен атқарылған жұмыстар түрік дипломатиясының шын мәнінде қалай дамығанын дәлелдейді»,- деді.

Омуралиев былтырғы форум аясында арнайы бір панель сессиясының өткенін айтып, бұл алаңның ТМҰ-ның 2040 стратегиясы мен сыртқы байланыстарын нығайту ісінде маңызды рөл атқаратынын жеткізді.

«Біз – теңдессіз ұйымбыз»

Түрік Мемлекеттері Ұйымының жобалық бағыттағы құрылым екенін атап өткен Омуралиев:
«Сыртқы саясат, экономика, сауда, туризм, энергетика, жастар саясаты, спорт, ғарыш саласы және басқа да 35-тен астам бағытта белсенді жұмыс істейміз. Бұл – бізді әрі жобалық, әрі бірегей ұйым етеді», – деді.

«Біз – ортақ тарих, дәстүр, мәдениет тіл және дінге негізделген ерекше ұйымбыз. Осындай іргетасқа сүйенетін басқа бір ұйым таба алмайсыз»,- деп жалғастырды ол.

Бастапқыда «Түркі тілдес мемлекеттердің ынтымақтастық кеңесі» (Түркі кеңесі) ретінде құрылған ұйымның негізі 2009 жылы 3 қазанда Әзербайжан, Қазақстан, Қырғызстан және Түркия қол қойған Нахчыван келісімімен қаланды.

Түрік Мемлекеттері Ұйымының басты мақсаты – түркі әлемін ортақ тарихи және мәдени құндылықтар арқылы саяси, экономикалық, білім, мәдениет, қорғаныс, қауіпсіздік, көлік, кеден, туризм және спорт секілді түрлі салада ынтымақтастық орнату арқылы біріктіру.