Израильдің Газадағы әскери операциялары мен палестиналықтарға гуманитарлық көмек көрсетуді шектеуіне байланысты халықаралық сын күшейіп жатқан кезде жарияланған сауалнамаға сәйкес немістердің көпшілігі Израильге қару экспорттауға қарсы.

«Civey Der Tagesspiegel» газеті үшін жүргізілген сауалнамаға қатысшылардың 51 пайызы Израильге қару-жарақ жөнелтуге қарсы екенін көрсетті. Бұл наразылық әсіресе солшыл сайлаушылар арасында айқын көрінді.

Премьер-министр Фридрих Мерц басқаратын христиан-демократтардың 34 пайызы Израильге қару экспорттауға қарсы екенін білдірсе, 22 пайызы бір нақты шешімге келе алмаған. Коалициядағы серіктес социал-демократтардың 48 пайызы Израильге қару-жарақ экспорттауды қате деп санайды.

Сауалнама нәтижесі халықтың премьер-министр Беньямин Нетаньяху үкіметіне қарсы көзқараста екенін көрсетті. Сауалнамаға қатысушылардың 44%-ы Израильге қатысты сыни көзқараста. 2023 жылдың жазында бұл көрсеткіш 33%-ды құраған болатын. Тек 23%-ы ғана Израиль үкіметімен тығыз байланыс орнатуды жақтады.

Сауалнама нәтижесі немістердің үштен екісіне жуығы үкіметтің Газаға гуманитарлық көмекті көбірек жіберуі үшін Израильге қысым көрсетуін қалайтынын көрсетті. 65 жастан асқан респонденттердің төрттен үшке жуығы, 18-29 жас аралығындағылардың 50% ғана Израильге саяси қысымның күшеюін қолдады.

2025 жылдың 23-26 мамыры аралығында жүргізілген сауалнамаға 18 және одан жоғары жастағы 3000-нан астам неміс азаматы қатысты.