Në Bosnjë e Hercegovinë u mbajt një ceremoni përkujtimore për 1.601 fëmijët e vrarë nga serbët në kryeqytetin e rrethuar Sarajevë gjatë luftës në vitet 1992-1995.
Në programin e mbajtur në Sarajevë morën pjesë të afërm të viktimave, qytetarë, zyrtarë dhe shumë fëmijë. Gjatë ceremonisë u bënë lutje për fëmijët e vrarë dhe u vendosën lule në monumentin e ndërtuar për ta mbajtur gjallë kujtimin për ta.
Kreu i Shoqatës së Familjeve të Fëmijëve të Vrarë në Rrethimin e Sarajevës në vitet 1992-1995, Fikret Grabovica, tha se ata po tërheqin vëmendjen ndaj vrasjeve brutale që iu nënshtruan banorët e Sarajevës gjatë viteve të rrethimit.
Ai theksoi se veçanërisht të rinjtë nuk duhet të harrojnë atë që ka ndodhur gjatë viteve të luftës.
"Ne të gjithë jemi përgjegjës për transmetimin e kulturës së kujtesës te brezat e rinj të cilët nuk kanë informacione të mjaftueshëm për atë që ka ndodhur gjatë rrethimit. Të rinjtë duhet të dinë se si u masakruan bashkëmoshatarët e tyre dhe si u shuan ëndrrat e tyre në mënyra të tmerrshme. Ata duhet ta dinë këtë jo për të urryer dikë, por për ta ndërtuar të ardhmen e tyre në mënyrën e duhur dhe për të parandaluar që të këqija të tilla të ndodhin përsëri", u shpreh Grabovica.
Nënkryetari i shoqatës, Alija Hoxhiq, tha se humbi fëmijën e tij të vetëm gjatë rrethimit dhe se dhimbja e tij u rëndua edhe më shumë me kalimin e kohës.
Ai thotë se çdo ditë që kalon me mall për fëmijën e tij bëhet edhe më e vështirë për të. "Fëmija im i vetëm, vajza ime Jasmina, u vra kur ishte 18-vjeçare. Ajo ishte vajzë e rritur, por vrasësit na e morën. Vëllezër të mi të dashur, mos i dëshironi luftë askujt sepse lufta sjell vetëm të keqen. Mund ta shihni këtë qartë sot në shembujt e Gazës, Ukrainës dhe Indisë", tha Hoxhiq.
Rrethimi i Sarajevës
Rrethimi më i gjatë në historinë moderne filloi më 5 prill të vitit 1992 dhe vazhdoi deri më 29 shkurt të vitit 1996.
Suada Dilberoviq, studente në Fakultetin e Mjekësisë të Universitetit të Sarajevës dhe Ollga Suçiq, nënë e dy fëmijëve që punonte në Parlamentin e Bosnjë e Hercegovinës u vranë në urën Vërbanja në Sarajevë si pasojë e sulmeve nga njësitë paramilitare serbe.
Njësitë serbe në sulmet e tyre më 5 prill shënjestruan drejtpërdrejt civilët, duke hapur zjarr ndaj qytetarëve të Sarajevës që po protestonin kundër luftës.
Dita kur u vranë Dilberoviq dhe Suçiq, në të njëjtën kohë shënoi gjithashtu fillimin e rrethimit më të gjatë të Sarajevës në historinë moderne, gjatë të cilit u vranë 11.541 persona, përfshirë 1.601 fëmijë.
