Sekretari amerikan i Shtetit Marco Rubio tha të mërkurën se Irani mund të zhvillojë një program civil bërthamor nëse pranon të heqë dorë nga pasurimi i uraniumit.
"Nëse Irani dëshiron një program bërthamor civil, ai mund ta ketë atë, si shumë vende të tjera në botë, duke importuar materiale të pasuruara," tha Rubio në një intervistë për "The Free Press podcast".
“Ekziston një rrugë drejt një programi bërthamor civil, paqësor, nëse ata e duan atë, por nëse këmbëngulin për pasurim, atëherë ata do të jenë i vetmi vend në botë që nuk ka një program ushtarak dhe megjithatë pasuron uraniumin dhe kjo është problematike”, shtoi ai.
Rubio kritikoi marrëveshjen bërthamore të vitit 2015, e cila u arrit gjatë administratës së Barack Obamës, sepse, sipas fjalëve të tij, ajo i dha Teheranit "koncesione të përhershme" në këmbim të "atyre të përkohshme".
Ai theksoi se Shtetet e Bashkuara të Amerikës nuk kërkojnë luftë.
"Ne nuk duam luftë. Ky nuk është një president që ka bërë fushatë me idenë e fillimit të luftërave," tha Rubio, duke iu referuar Presidentit Donald Trump.
"Ai nuk do të preferonte të përdorte forcën ushtarake, qoftë nga ne apo nga dikush tjetër. Ai do të preferonte që një marrëveshje të arrihet përmes negociatave," shtoi ai.
Rubio paralajmëroi se çdo veprim ushtarak mund të nxisë një konflikt më të gjerë në rajon dhe përsëriti angazhimin e administratës ndaj diplomacisë.
“Nëse ka një shans për paqe, ne do t’i japim çdo mundësi që kjo sfidë të ketë sukses me një zgjidhje paqësore”, tha ai, duke shtuar:
"Por unë do t'u thoja të gjithëve se ne jemi ende shumë larg nga çdo marrëveshje me Iranin."
"Ne jemi të vetëdijshëm se është e vështirë dhe e ndërlikuar. Fatkeqësisht, paqja shpesh është e tillë. Por, ne jemi të përkushtuar për të arritur një zgjidhje paqësore që do të jetë e pranueshme për të gjithë," përfundoi Rubio.
Irani dhe ShBA-ja mbajtën dy raunde bisedimesh në Oman dhe Itali në fillim të këtij muaji, me të dyja palët që i përshkruan ato si "konstruktive".
Trump ka kërcënuar më parë me veprime ushtarake kundër Iranit nëse nuk arrihet një marrëveshje e re bërthamore për ta zëvendësuar atë të vitit 2015.
