Sekretarja e Bujqësisë e ShBA-së, Brooke Rollins, ka bërë të ditur se vendi i saj do të importojë qindra miliona vezë nga Türkiye dhe Koreja e Jugut për të trajtuar mungesën e rëndë të shkaktuar nga shpërthimi i gripit të shpendëve dhe ndërprerjet e zinxhirit të furnizimit.

“Ne kemi Türkiyen dhe Korenë e Jugut që po importojnë vezë. Po flasim për qindra miliona vezë për një afat të shkurtër. Kjo është mjaft e rëndësishme për të ndihmuar në uljen e çmimeve për momentin”, u tha Rollins gazetarëve në Shtëpinë e Bardhë.

ShBA-ja është gjithashtu në bisedime me vende të tjera për importe shtesë.

Lëvizja është pjesë e një plani prej pesë pikash që Rollins zbuloi në fillim të muajit mars për të luftuar krizën, e cila ka rritur çmimet e vezëve me 15.2 për qind në janar, rritja më e madhe mujore që nga qershori i vitit 2015.

Gjatë pesë viteve të fundit, sipas Departamentit të Punës, çmimet e vezëve janë rritur me 230 për qind.

Rollins theksoi rëndësinë e masave të bio-sigurisë për të kontrolluar shpërthimin e gripit të shpendëve, i cili ka shkatërruar popullimin e shpendëve për pothuajse dy vjet.

“Mënyra më e provuar për ta zgjidhur këtë është përmes masave të bio-sigurisë dhe kjo do të thotë mbylljen e hambarëve tuaj. Që kur filluam ta bënim atë, ne kemi parë një rënie të konsiderueshme të gripit të shpendëve”, tha sekretarja e Bujqësisë.

ShBA-ja po ashtu po punon për ri-popullimin e pulave që bëjnë vezë, një proces që administrata e presidentit Donald Trump pretendon se është ngadalësuar nga rregulloret e administratave të mëparshme.

Më herët, siç u njoftua, Türkiye do të importojë 15 mijë tonë vezë deri në qershor të vitit 2025 si një zgjidhje kyçe afatshkurtër.

Masat afatgjata përfshijnë një investim prej 1 miliard dollarësh për të stabilizuar tregun dhe për të parandaluar shpërthimet e ardhshme.

“Ky është një plan mjaft i madh, masiv”, tha Rollins në muajin shkurt, duke shprehur optimizëm për ndikimin e planit.