Presidenti turk Recep Tayyip Erdoğan dënoi fuqishëm të hënën sulmin vdekjeprurës terrorist që kishte në shënjestër Kishën Mar Ilyas në Damaskë, kryeqytetin e Sirisë.
Në një postim në X, ai e cilësoi si “sulm terrorist të neveritshëm” aktin që ndodhi në Kishën Mar Ilyas në Damaskë.
Erdoğan shprehu ngushëllime për familjet e viktimave, qeverinë siriane dhe popullin e Sirisë.
“Uroj shërim të shpejtë për të plagosurit”, shtoi kreu i shtetit turk.
Presidenti turk theksoi se sulmi kishte për qëllim destabilizimin e paqes, sigurisë dhe bashkëjetesës në Siri dhe në rajon në tërësi.
“Përballë këtij akti të ulët terrorist që synon paqen, stabilitetin e brendshëm dhe kulturën e bashkëjetesës në Siri, ne qëndrojmë përkrah popullit dhe qeverisë siriane”, theksoi ai.
Erdoğan nënvizoi mbështetjen e Ankarasë për përpjekjet e Sirisë në luftën kundër terrorizmit.
“Nuk do të lejojmë kurrë që Siria, fqinji dhe vëllai ynë, që për herë të parë pas vitesh po sheh drejt së ardhmes me shpresë, të rikthehet në pasiguri përmes grupeve terroriste nën ndikim të jashtëm”, deklaroi ai.
“Türkiye do të vazhdojë ta mbështesë luftën e qeverisë siriane kundër terrorizmit”, përfundoi Presidenti i Türkiyes.
Një atentator vetëvrasës nga grupi terrorist ISIS (Daesh) hapi zjarr të dielën brenda kishës në lindje të Damaskut, përpara se të shpërthente veten, duke vrarë të paktën 20 persona dhe duke plagosur 52 të tjerë, sipas Ministrisë së Shëndetësisë së Sirisë.
Ngjarja ndodhi vetëm disa javë pasi Ministria e Brendshme e Sirisë njoftoi, më 26 maj, zbulimin e celulave të ISIS në zonat rurale përreth Damaskut. Gjatë operacionit, autoritetet raportuan sekuestrimin e armëve të lehta dhe të mesme.
Që nga rrëzimi i regjimit të Asadit, shërbimet e sigurisë siriane kanë vijuar ndjekjen e personave të akuzuar për përfshirje në krime, shkelje të të drejtave të njeriut dhe veprimtari terroriste.
Bashar al-Asad, udhëheqës i Sirisë për gati 25 vjet, u arratis në Rusi në dhjetor, duke i dhënë fund regjimit të Partisë Baath, që ishte në pushtet që nga viti 1963.
Ahmed Al-Sharaa, i cili udhëhoqi forcat anti-regjim për rrëzimin e Asadit, u shpall president i përkohshëm në janar.
